Ka përfunduar në Bruksel takimi i parë ndërmjet kryeministrit të Kosovës, Albin Kurti dhe presidentit të Serbisë, Aleksandar Vuçiç. Presidenti i Serbisë, Aleksandër Vuçiç, deklaroi se negociatat me delegacionin e Prishtinës nuk ishin aspak të suksesshme.
”Ata vetëm na kërkuan të themi kur do ta njohim pavarësinë e Kosovës. Shqiptarët nuk erdhën në dialog, por vetëm për të provokuar dhe provokuar reagimin e Beogradit’‘ – tha Vuçiç.
Presidenti i Serbisë thotë se ishte rënë dakord që dialogu të vazhdojë deri në fund të korrikut, por gjithashtu deklaroi se ai nuk do të marrë pjesë në një takim të tillë, për shkak të mungesës së përgjegjësisë dhe realitetit nga ana e Prishtinës.
Ai tha se delegacioni i Prishtinës nuk dëshiron të përmbushë marrëveshjet e nënshkruara nga shqiptarët dhe nuk dëshiron të diskutojë mbi Bashkimin e Komunave Serbe.
”Ata i quajnë incidente dhe provokime fakti që serbët duan të marrin pjesë në liturgji në kishat e tyre. Isha shumë i sjellshëm, sepse nuk doja të vija në dukje gjëra të tjera, për shkak të mungesës së plotë të një përgjigjeje realiste”. – tha Vuçiç.
Ai shtoi se do të fliste me serbët nga Kosova dhe Metohija në ditët në vijim, sepse, thotë ai, është shumë i frikësuar, duke parë se sa papërgjegjësi do të duhet të përballemi në të ardhmen.
‘Ne jemi të gatshëm të pranojmë çdo datë dhe ditë për vazhdimin e bisedimeve, kjo është shumë e rëndësishme dhe nuk ka asgjë më të rëndësishme për ne sesa sigurimi për njerëzit tanë në Kosovë dhe Metohi dhe respektimi i gjithçkaje të nënshkruar‘- tha Vuçiç.
Nga ana tjetër kryeministri Albin Kurti me anë të një postimi në Facebook ka theksuar se në takimin e mbajtur sot në Bruksel për dialogun me Serbinë, Kosova ka treguar gatishmërinë sipas tij për dialog konstruktiv për arritjen e njohjes së ndërsjellët.
Ndëtkohë që ka theksuar se takimi I rradhës do të mbahet para datës 25 Korrik, sërish në Bruksel, edhe pse kishte mungesë akordi për axhendën e takimit të ardhshëm.
Kurti njoftoi se ai kishte ngritur katër propozime në këtë takim.
1. Gjashtë shtetet e Ballkanit Perëndimor e avansojnë CEFTA-n në SEFTA (South-East European Free Trade Agreement) sipas modelit të EFTA-EEA, pra marrëveshje të ngjashme me atë të Lihtenshtajnit, Norvegjisë dhe Islandës me BE-në.
2. Kosova dhe Serbia, duhet të nënshkruajnë një marrëveshje të përbashkët të paqes duke u zotuar se nuk do ta sulmojnë njëra-tjetrën. Kjo është e rëndësishme tani si asnjëherë më parë, një ditë pas Samitit të NATO-s në Bruksel dhe porosive unanime që u dhanë aty.
3. Pas njohjes së ndërsjelltë midis Republikës së Kosovës dhe Republikës së Serbisë, në të dy vendet tona do të kemi reciprocitet bilateral, përfshirë edhe pakicat etnike.
4. Për çështjen e të pagjeturve, të të zhdukurve me dhunë, duhet larguar nga pozita që ka dhe duhet marrë në pyetje kreun e delegacionit serb, z. Veljko Odaloviç, i cili në vitet 1997-1999, ishte “naçelnik i qarkut të Kosovës”, dhe udhëhiqte me Kosovën e okupuar bashkë me z. Zoran Angjelkoviç.
Kurti theksoi se asnjë nga propozimet e tij nuk morën aprovimin e delegacionit serb, tre të fundit u hodhën poshtë dhe e para nuk u komentua. Ndërkohë që ditën e sotme shefi I politikës së jashtme I BE, do të takohet me Presidentin Biden, ku një nga temat e diskutimit do të jetë dialogu Kosovë-Serbi.
g.kosovari
