Ibsen Elezi kandidoi përballë Sali Berishës për kreun e Partisë Demokratike. Siç pritej, i humbi shumë thellë zgjedhjet.
I ftuar në emisionin “Të Paekspozuarit” në MCN TV, Elezi kishte disa pretendime për pabarazi në garë, por tha se nuk ia kanë prekur votat, pra 2500 votat që mori në total.
Pjesë nga biseda në studio:
Ylli Rakipi: Ditën e diel si u zhvillua procesi? Si ishin votimet?
Ibsen Elezi: Unë mora 2500 vota, 6%.
Ylli Rakipi: Ke vërejtje për procesin?
Ibsen Elezi: Kam dosje, jo vërejtje.
Ylli Rakipi: Cilat janë provat?
Ibsen Elezi: Procesi deri ditën e votimit, ka disa rregulla bazikë. Gara e lirë në kushte të barabarta, që do të thotë të jemi njëlloj në start (nisje). Koha nuk është mjaftueshme, e kam ngritur si problem. Duke qenë se kandidati tjetër e kishte kryer fushatën, nëpërmjet Foltoreve, mua duhet të më jepej kohë e mjaftueshme, por mu dha dhjetë ditë.
Listat, kishte detyrim statutor nga 11 dhjetori. Deklarohet edhe nga vetë komisioni që ka probleme të rënda. Listat janë me shumë gabime. Nuk u krye procesi i verifikimit.
U kam kërkuar, hajde ulemi rregullojmë listat. Nuk i kanë dhënë listat deri ditën e fundit.
Kam kërkuar debatin si premtim dhe si normë demokracie. E kam kërkuar në mënyrë të vazhdueshme. Nuk e ka pranuar Berisha.
Kërkova të mos jetë Albana Vokshi, sepse ka manipuluar votat, unë kam depozituar kërkesë për të dhe disa persona. Albana është stërvitur nga Jemini. Kishte arritur në stadin që të jetë vetë drejtuese e procesit. E kam hallin me fenomenin. I thashë nëse pranon që Gjiknuri ia bën tërmet, tërmet, procesit zgjedhor, edhe kjo ja bën tërmet tërmen në PD.
Ylli Rakipi: Me Saliun, ti nuk fitoje dot!
Ibsen Elezi: Pa bërë garë nuk do mësohet njeri të bëjë garë.
Ylli Rakipi: Ti ke bërë sakrificë që të mësohet gara? Se kështu kanë shkuar të gjithë, Maqo Lakrori, Eduard Selami… Ti mendon se të kanë vjedhur votat?
Ibsen Elezi: Votat e mia, unë nuk mendoj se i ka prekur njeri.
Ylli Rakipi: Epo paska proces të ndershëm.
Ibsen Elezi: Unë nuk kam të drejtë të them më janë prekur votat. Të garantoj që ka patur tentative të vazhdueshme për të hyrë në marrëveshje të shtohen votat.
