Situata pas reshjeve të shiut në qarkun e Gjirokastrës mbetet shqetësuese.
Deri në mesditën e kësaj të enjteje, bilanci flet për dhjetë familje të evakuuara, fshatra të tërë të izoluar dhe dëmtime serioze në infrastrukturë.
Evakuimet dhe zonat në rrezik
Konkretisht, janë evakuuar dy familje në qytetin e Gjirokastrës, dy në fshatin Labovë, dy në Hoshtevë të Zagorisë dhe katër të tjera në Përmet, të cilat janë akomoduar përkohësisht në konvikt.
Në fshatin Nokovë, po punohet me urgjencë për devijimin e ujit që rrezikon shtëpitë.
Problemet me qarkullimin dhe izolimi
Lëvizja drejt veriut mbetet e vështirë. Në aksin Gjirokastër–Tepelenë, kalimi i mjeteve bëhet vetëm me një korsi në vendin e quajtur “Shkalla e Zezë”.
Ndërkohë, në kilometrin e 17-të, lumi Drino ka rrezikuar seriozisht trupin e rrugës, duke detyruar firmat kontraktore të përforcojnë argjinaturën.
Buhali dhe Frashëri janë të bllokuar nga prurjet e mëdha të ujit. Fshatrat Topovë, Zhej dhe Lliar mbeten pa komunikim rrugor. Ushtria ka ndërhyrë me mjete të rënda në fshatin Tërbuq për të hapur rrugën.
Niveli i lumit Vjosa mbetet në kuota kritike, duke arritur në 6.5 metra në Memaliaj, ku kanë nisur edhe gërryerjet e tokave bujqësore. Sa i përket urave, ajo e Glinës në Dropull ka pësuar dëmtime të reja, ndërsa një urë e vogël që lidh fshatrat Krinë dhe Saraqinishtë është nxjerrë jashtë funksionit.
