Rikthehen alarmet për bombë dhe atentat me lëndë eksplozive në Tiranë. Një granatë është vendosur në gomën e pasme të një automjeti në zonën e Fushës së Aviacionit në kryeqytet.
Nga të dhënat e para bëhet e ditur se në gomën e pasme të automjetit tip “Benz” me targa AA 307 DB është vendosur një mjet shpërthyes granatë.
Ka qenë vetë pronari i automjetit Agim Ahmetaj i cili ka parë lëndën eksplozive dhe ka lajmëruar menjeherë policinë. Automjeti mësohet se ka qenë i parkuar gjatë gjithë kohës, ndërsa granata është vendosur gjatë mbrëmjes.
Në vendin e ngjarjes kanë mbërritur uniformat blu si dhe forcat xheniere të cilët bënë të mundur neutralizimin e granatës.
Burime nga policia bëjnë të ditur për JavaNeës.al se pronari i automjetit është shoferi i një avokati, ndërsa nuk dihet ende autori dhe shkaku i atentatit të mbetur në tentativë.
