Noterja Rezarta Koçi 40 vjeç është ndaluar nga Policia e Tiranës në kuadër të aksionit “Noterja” në bashkëpunim me Prokurorinë e Tiranës.
40-vjeçarja akuzohet për shpërdorim detyre dhe vjedhje e kryer duke shpërdoruar detyrën. Ndaj Rezarta Koçit janë bërë disa denoncime nga qytetarë sipas të cilëve noterja u merrte paratë.
Në vitin 2021, ajo ka përvetësuar në mënyrë të kundërligjshme shuma të konsiderueshme monetare nga qytetarë të ndryshëm.
Pak javë më parë, më 26 Janar 2022, edhe emisioni Stop në Tv Klan transmetoi rastin e një qytetareje e cila akuzonte noteren Rezarta Koçi se i kishte marrë mijëra Euro, shuma e parave nga kontrata e shitjes së shtëpisë. Sipas denoncimit të bërë në Stop, noterja nuk i kishte kaluar 72 milionë Lekë pronares që kishte shitur shtëpinë, por shumën e parave e kishte kaluar përmes transaksionit bankar në llogarinë e saj.
Kujtojmë se pak muaj më parë, noteres Rezarta Koçi i ishte vendosur eksploziv poshtë makinës së parkuar në lagjen “Komuna e Parisit” në Tiranë.
Vite më parë, Rezarta Koçit i ishte hequr licenca nga Dhoma e Noterëve, por më pas përmes vendimit të Gjykatës Administrative Tiranë licenca iu rikthye. Pasi rifitoi licencën, noterja Rezarta Koçi nuk gjendej se ku e kishte zyrën e saj të noterisë, pasi edhe në adresën që kishte deklaruar, shkruhej se ambienti jepet me qira.
/a.r
