Biznesmeni Fatmir Kuçi nëpërmjet avokatit të tij, Alban Qafa, ka depozituar në Prokurori një kallëzim penal ndaj oficerit të Policisë Gjyqësore, Arjan Veshaj, për veprën penale të shpërdorimit të detyrës, pasi në kundërshtim me ligjin nuk ka kryer veprimet në ngjarjen e ndodhur me 3 gusht ne gjirin e Himarës ku gjeti vdekjen një turist. Në kallëzim thuhet se Veshaj edhe pse është vënë në dijeni dhe i është kërkuar edhe nga i pandehuri që të shkojë në vendin e ngjarjes, në thellësi të detit aty ku u gjet i plagosur turisti rus, ka refuzuar që të shkojë duke dëmtuar në mënyrë serioze hetimin e çështjes dhe interesat e biznesmenit.
Ndërkohë sipas ligjit oficeri i Policisë Gjyqësore menjëherë pas lajmit duhet të shkonte në vendngjarje të shihte nëse kishte njolla gjaku, apo gjurmë të tjera si sende vetjake, duhet të shkonte që të përcaktonte distancën nga bregu të merrte kampionet e njollave të gjakut, si dhe të bënte përshkrimin e ekzistencës apo mungesës së elementëve që përcaktojnë distancat lejuara për notarët për mjetet motorike ujore, si dhe personat që kryejnë zhytje sportive. I kontaktuar nga “News 24” avokati Alban Qafa sqaroi se këqyrja e vendit ku ndodhi ngjarja do te përcaktonte nëse kishim të bënin me vepër penale me një rast aksidental apo me një fatkeqësi duke përcaktuar edhe përgjegjësinë përkatëse.
Sipas avokatit Qafa, “Refuzimi i këqyrjes së vendit të ngjarjes ka sjellë edhe konfuzionin për sqarimin e ngjarjes”. Ndërkaq vetëm disa ditë më parë, avokati i Kuçit ka depozituar një kallëzim penal në prokurori edhe për një tjetër oficer të Policisë Gjyqësore pasi kanë marrë në pyetje djalin e Kuçit vetëm 11 vjeç, pa praninë e një avokati dhe psikologu, në kundërshtim flagrant me ligjin. Gjykata e Vlorës caktoi arrest me burg për Fatmir Kuçin, i dyshuar se goditi për vdekje me motoskaf turistin rus, Denis Kaiumov. / BW
