Gjykata e Posaçme kundër Korrupsionit dhe Krimit të Organizuar (GJKKO) ka shpallur fajtor ish-kandidatin e Partisë Demokratike në Rrogozhinë, Engjell Cara, si dhe katër persona të tjerë, të akuzuar për korrupsion zgjedhor gjatë vitit 2023. Vendimi u mor më 6 shkurt 2026 nga trupi gjykues i përbërë nga gjyqtaret Atalanta Zeqiraj, Flora Hajredinaj dhe Irena Gjoka.
Engjell Cara, Limon Shala, Fatmir Thaçi dhe Florant Saraçi u shpallën fajtorë për veprën penale “Korrupsioni aktiv në zgjedhje”, të kryer në bashkëpunim dhe më shumë se një herë. Secili prej tyre u dënua me 1 vit e 6 muaj burgim, por pas aplikimit të gjykimit të shkurtuar, dënimi u reduktua në 1 vit burgim.
Gjykata vendosi pezullimin e ekzekutimit të dënimit dhe vënien e tyre në provë për një periudhë 2-vjeçare, me kusht që të mos kryejnë vepër tjetër penale dhe të mbajnë kontakte me Shërbimin e Provës.
Shkëlqim Hoxha u shpall fajtor për veprën penale “Moskallëzimi i krimit” dhe u dënua me 6 muaj burgim, i reduktuar në 4 muaj pas gjykimit të shkurtuar. Dënimi u pezullua dhe u zëvendësua me detyrimin për të kryer 60 orë punë në interes publik brenda një periudhe prej 6 muajsh, si dhe mbajtjen e kontakteve me Shërbimin e Provës.
