Një ljam i djeshmëm i një televizioni kombëtar, ku flitej se Ambasadorja e BE-së Romana Vlahutin kishte fshehur pasurinë dhe të ardhurat e saj duke mos i deklaruar në kohën që kishte qenë në Kroaci, ka sjellë dhe reagimin e kësaj të fundit këtë të martë. Përmes një deklarate për median, zyra për shtyp e Delegacionit Europian në Tiranë, sqaron se Ambasadorja Vlahutin është larguar nga pozicioni i Këshilltarit për Punët e jashtme të Presidentit më 30 shtator 2014, dhe e ka dorëzuar formularin e saj të vetëdeklarimit. Por në vitin 2015 ky formular është ndryshuar dhe i janë shtuar një sërë detajesh të tjera.
“Në janar 2015, formulari i deklarimit për zyrtarët publik në Kroaci u ndryshua në një formular shumë më të detajuar në format elektronik. Për këtë arsye, Komisioni kishte dërguar një shkresë zyrtare me anë të së cilës kërkonte sqarime të mëtejshme për disa çështje, por këtë shkresë Ambasadorja Vlahutin nuk e kishte marrë, për arsye se ajo nuk ishte më banuese në Zagreb, pasi kishte lëvizur në Tiranë në tetor 2014” thuhet më tej në sqarim.
Sipas zyrës për shtyp të Delegacionit Europian në Tiranë “në janar 2016, Ambasadorja Vlahutin gjeti në postën e saj një letër tjetër dhe u lidh menjëherë me Komisionin, duke kërkuar mundësinë e plotësimit të pjesëve të reja të formularit. Por kjo nuk ishte e mundur nga pikëpamja procedurale, për arsye se regjistrat në Kroaci janë aktivë vetëm për një periudhë deri në 12 muaj pas largimit nga shërbimi publik dhe Ambasadorja Vlahutin nuk e kishte më statusin e zyrtarit publik, siç shpjegohet edhe në vendimin administrativ të Komisionit”.
“Për më tepër, zyrtarët kroatë në kategorinë e Ambasadores Vlahutin u nënshtrohen një verifikimi sigurie të hollësishëm (sekret NATO/BE) i cili përfshin një sasi edhe më të hollësishme dhe tërësore informacioni se sa deklarimi, përfshirë të gjitha informacionet mbi transaksionet financiare dhe pasurinë” përfundon sqarimi./java/a.k
