Kryebashkiaku i Durrësit Vangjush Dako ka reaguar pas akuzave të Partisë Demokratike dhe kreut të saj Lulzim Basha.
Dako thotë se do çojë në gjyq Bashën për shpifje dhe se nuk do i ndahet derisa të gëlltisë baltën e tij
Reagimi i Dakos vjen pas akuzave të Lulzim Bashës se është i lidhur me krimin.
Edhe sot, kreu i PD në takimin me ambasadorin e SHBA përsëriti akuzat ndaj Dakos. Kjo ka bërë që kryebashkiaku i Durrësit t’i drejtohet drejtësisë.
“Kam vendosur ta çoj në gjyq Lulëzim Bashën, si një shpifës profesionist që e ka kaluar cakun e tolerancës time. Ky njeri që gënjen sy për sy kë t’i dalë përpara, një i paaftë që si kryetar bashkie la kokrrën e namit me paaftësinë e me gënjeshtrat e tij dhe si kryetar i opozitës e ka bërë qesharake Partinë Demokratike, duhet të përgjigjet përpara drejtësisë për shumë gjëra.
Por nëse për ato të rëndat fare me dëme ekonomike kolosale, do t’i japë patjetër përgjigjet e veta përballë institucioneve të reja të reformës në drejtësi që ai po bën çmos ta bllokoje, me mua do të përballet e do të përgjigjet përpara gjykatës për shpifjet e tij prej mashtruesi profesionist.
Kam marrë vesh që ky karafil nuk shkon në gjyqet ku e çojnë njerëzit që i akuzon me shpifjet e tij ordinere! Por vjen s’vjen në gjyq të perballet me modelin e shpifur politik që ai mishëron, unë e kam ndarë mendjen që të mos i ndahem derisa të gjithë baltën e tij ta gëlltisë mbrapsht në sytë e gjithë popullit.”, shkruan Dako.
