Autoriteti Kombëtar i Ushqimit ka kryer një kontroll në Snack Baret dhe në restorantet e zonës së ish-Bllokut në Tiranë.
Me urdhër të Drejtorit të Përgjithshëm të AKU-së, Dritan Sejko, janë kontrolluar lokalet e natës që kanë edhe kuzhinë në brendësi të tyre.
Nga 23 inspektime janë marrë masa paralajmërim dhe gjobë për 18 subjekte. Konkretisht Autoriteti Kombëtar i Ushqimit ka vendosur gjobë në vlerën 900.000 lekë për disa biznese, të cilat nuk plotësonin kushtet higjieno-sanitare, kishin vlerat mbi normën e lejuar për komponentët e vajit, por edhe nuk kishin dokumentacionin që përcakton ligji.
Gjithashtu për shkak se nuk plotësonin kushtet, Autoriteti Kombëtar i Ushqimit ka marrë masën “ndërprerje e kryerjes së veprimtarisë” për 2 subjekte.
AKU bën me dije se do të vijojë kontrollet në gjithë vendin për garantimin e sigurisë ushqimore në çdo sektor. /a.m.
