Pas 1 shkurtit qeveria nis aksionin për formalizmin e sektorit të ujit të pijshëm me vendosjen e sahateve dhe mbledhjen e faturave të papaguara. Aksioni do të shtrihet në dy faza. Do të nisë me sensibilizimin e qytetarëve për vendosjen e sahateve dhe më pas me kontrollin derë më derë për pagimin e faturave të prapambetura.
Ministri i Infrastrukturës dhe Energjisë, Damian Gjiknuri, nëpërmjet një letre drejtuar bashkive dhe ndërmarrjeve të ujësjellëskanalizimeve u kërkon marrjen e masave për nisjen e aksionit në terren. Ministri Gjiknuri shpjegon se fillimisht aksioni do të nisë sensibilizimin e qytetarëve për pajisjen me kontratë dhe sahat të ujit të pijshëm.
“Në lidhje me fazën e parë të aksionit, ‘faza e mirëkuptimit’, që përfundon më datë 1 shkurt 2018 dhe që konsiston në sensibilizimin e qytetarëve për formalizmin e shërbimit dhe pajisjen me ujë- matës kërkohet angazhimi juaj për marrjen e masave për ofrimin e shërbimit në mënyrë sa më eficiente nga stafet e shoqërive të ujësjellës- kanalizimeve për përballimin e fluksit të pritshëm të kërkesave të qytetarëve për pajisjen me kontratë dhe ujëmatës”, thuhet në letrën e ministrit Gjiknuri.
Ministri i Energjetikës shpjegon se faza e dytë do të shoqërohet me kontrolle derë me derë dhe me masa ndëshkimore për ata që nuk paguajnë faturat e ujit.
“Në fazën e dytë të aksionit, që konsiston me verifikimin e formalizmit të shërbimit të çdo abonenti derë më derë, pajisjen me ujë- matës të të gjithë abonentëve dhe marrjen e masave për vënien përpara përgjegjësisë të kundërvajtësve dhe shkelësve që ndërhyjnë në rrjetin e ujësjellës–kanalizimeve”, thuhen në letrën ministrit Gjiknuri./a.ç
