Policia e Fierit ka zbardhur detaje nga aksidenti tragjik në aksin Levan-Tepelenë, ku humbi jetën një 39- vjeçare.
Burime nga grupi hetimor tregojnë se makina tip “Kia” e drejtuar nga viktima N.A doli nga korsia e saj dhe u përplas me një furgon tip “Benz”, që drejtohej nga 57-vjeçari P. M.
Ekspertët e aksidenteve kanë konstatuar se makina e viktimës nuk kishte shenja të frenimit, ndërsa furgoni ka arritur të frenojë 20 metra pas përplasjes. Përplasja ishte e fortë dhe automjeti i 39-vjeçares u nda pothuajse në dy pjesë.
Burimet policore nënvizojnë se, pavarësisht shpejtësisë së furgonit, aksidenti do të kishte pasojë fatale, pasi makina e viktimës kishte hyrë në korsinë e kundërt.
Hetimet e policisë, përfshirë dëshmitë e të afërmve të viktimës, tregojnë se 39-vjeçarja po kthehej nga Vlora drejt vendbanimit të saj në Varibop të Cakranit.
Një mikeshë e viktimës i ka thënë policisë se “viktimënmund ta ketë zënë gjumi”, duke e bërë përgjumjen pistën kryesore të daljes nga korsia e saj.
Rrethrotullimi i Varibopit ndodhet disa kilometra larg vendngjarjes, duke përjashtuar dyshimet se ajo mund të kishte tentuar të ndryshonte drejtim.
Pas aksidentit, policia ka arrestuar drejtuesin e furgonin, i akuzuar për shkelje të rregullave të qarkullimit rrugor.
Hetimet vazhdojnë për të sqaruar të gjitha rrethanat e aksidentit.
