Dënimi me vetëm 40 ditë punë të detyruar nga gjykata i drejtuesit të automjetit që shtypi për vdekje një grua teksa përpiqej të shpëtonte dy fëmijët e saj, ka ngjallur reagimin edhe të klasës politike.
Deputeti i PS-së, Erjon Braçe e cilësoi ngjarjen e djeshme si një “krim të gjykatësve dhe politikanëve”.
“Vrasësi me timon është krim i gjykatësve dhe politikanëve që po i mbrojnë!
S’kam ndërmend të hesht, as si qytetar dhe as si politikan.
Mos bëni sikur nuk kuptoni.
Vrasësi me timon i një nëne është një i falur nga gjykata! Unë mund t’i turrem Saimir Tahirit përsëri, meqë ky është trendi në këtë vend, por policia e shtetit e ka bërë detyrën më parë.
E ka ndaluar vrasësin, ka refuzuar të korruptohet prej tij, e ka ndaluar dyfish edhe për këtë, ia ka dorëzuar prokurorisë dhe gjykatës dhe gjykata përmes një njohje të vjetër Martin Dedës, ka ndalur drejtësinë duke e falur dhe hedhur në rruge, sërish me timon në dorë vrasësin!
Ndaj nëse keni zë, ulërini për këta gjykatës që vendosin pro vrasësve. Ulërini edhe ndaj politikanëve që po mbrojnë këta gjykatës!
Sot ishte dita kur tamam këta politikanë kërkuan dhe refuzuan në emër të sovranitetit të gjykatësve banal që të vrasin me “drejtësinë” që bëjnë! Politikanët, edhe unë, kanë një mal me të meta, as që diskutohet kjo. Por ky i sotmi është krim i gjykatësve dhe politikanëve që i mbrojnë dhe u shërbejnë!”, shkruan deputeti Braçe në profilin e tij në Facebook.
