Të paktën 23 persona u vranë dhe 11 të tjerë u plagosën rëndë sot pas rrëzimit të një autobusi me turistë lokalë në jugperëndim të Turqisë, sipas autoriteteve lokale.
Amir Çiçek, guvernator i Muglas konfirmoi se numri i viktimave ka arritur në 23 ndërsa 11 janë të plagosur. Ai shtoi se në autobusin e aksidentuar ndodheshin vetëm turistë vendas.
“Fatkeqësisht, ne kemi 23 të vdekur dhe 11 të plagosur rëndë”, deklaroi Amir Ciçek në stacionin informativ NTV.
“Ky është një aksident i tmerrshëm”, deklaroi guvernatori i provincës së Muglas duke shtuar se automjeti transportonte 40 pasagjerë, pjesa më e madhe gra.
Në vendngjarje janë dërguar një numër i madh autoambulancash, ekipe zjarrfikëse dhe të Mbrojtjes civile. Të plagosurit janë dërguar në spitalet në Marmaris dhe Muglas.
Në autobusin, që u nis në mëngjes nga Izmiri drejt Marmarisit, udhëtarët ishin kryesisht gra dhe fëmijë.
“Një hetim për shkaqet e aksidenti ka filluar. Frenat e autobusit mendohet të mos kenë funksionuar”, deklaroi guvernatori Ciçek për NTV.
Marmaris është një prej vendeve kryesore turistike në pjesën mesdhetare të Turqisë dhe shumë turq përfitojnë nga rritja e temperaturave për të kaluar fundjavën./b.d
