Një aksident me vdekje ka ndodhur ditën e sotme në Kosovë, në rrugën Kaçanik-Hani Elezit.
Sipas mediave të Kosovës, një grua ka humbur jetën si pasojë e aksidentit. Aksidenti ka ndodhur pasi viktima, e cila ishte drejtuese e automjetit, ka humbur kontrollin e mjetit dhe ka dalë jashtë rrugës, duke rënë në një humnerë disa metra.
Lajmin e ka konfirmuar edhe zëdhënësi i Policisë për Rajonin e Ferizajt, Kanun Veseli. Veseli ka thënë se rasti po hetohet nga Njësia për Hetimin e Aksidenteve.
“Ju njoftojmë se me datën 29.11.2024 rreth orës 07:30 kemi pranuar një informatë se në rrugën magjistrale Kaçanik-Hani Elezit, tek vendi i quajtur “Kulla me qeshmë” , ka ndodhur një aksident komunikacioni rrugor, ku është përfshirë një veturë.
Ekipe të policisë, zjarrëfikësit dhe ambulanca kanë dalë menjëherë në vendin e ngjarjes. Nga hetimet e para mësohet se një veturë Nissan, derisa ka qarkulluar në magjistralen Kaçanik – Hani Elezit, në rrethana ende të pasqaruara ka humbur kontrollin mbi automjet dhe ka dalë jashtë rrugës, duke rënë në humnerë disa metra.
Si pasojë e këtij aksidenti një person e gjinisë femër, e moshës madhore ka humbur jetën, vdekja e së cilës është konstatuar nga mjekët në vendin e ngjarjes “, ka deklaruar Veseli.
/a.r
