Ministri i Financave, Arben Ahmetaj zhvilloi të martën një takim me Administratën tatimore dhe median, në kuadër të vijimit të aksionit kundër informalitetit dhe fillimin e fushatës së ndërgjegjësimit për kuponin tatimor, nga ku bëri të ditur se nga 1 gushti do të ketë sërish një verifikim në terren të situatës së kuponave.
Ndërkohë që kemi shpallur një fushatë intensive të thjeshtimit të procedurave vazhdojmë intensifikimin me fushatën komunikuese mes tatimeve e subjekteve tatimpaguese.
Ahmetaj bëri të ditur se vlera mesatare për kupon vjen në rritje për periudhën 6 mujore krahasuar me 6-mujorin e parë të vitit 2015. Kuponi, tha ai, garanton luftën kundër varfërisë dhe pabarazisë. Ahmetaj prezantoi edhe një spot që tregon rëndësinë e kuponit.
Ai ngriti një tjetër problem që ka të bëjë me numrin e kasave mos transmetuese . Sipas tij ky numër është akoma shumë i madh. Për këtë ai informoi se inspektorët do të verifikojnë në terren nëse është situatë evazioni apo situatë teknike, megjithëse shprehu bindjen se kemi të bëjmë me evazion. Objekt verifikimi do të jenë kryesisht, sipas tij, subjektet në zonat turistike.
Ministri u ndal edhe në ecurinë pozitive të mbledhjes së të ardhurave në buxhet për gjysmën e parë të këtij viti.
“Të adhurat e 6 mujorit të parë të këtij viti rezultojnë 5.8 % më të larta ose 10.6 miliardë lekë më shumë se e njëjta periudhë e vitit 2015. Mesatarja e rritjes së të ardhurave për të njëjtën periudhë 6 mujore në tre vitet e fundit është 7.4 % kur për periudhën 2012-2013 ishte rreth 0.6 %”, deklaroi ministri.
Kreu i financave publike tha se edhe numri i bizneseve të regjistruara është rritur Bizneset e reja të regjistruara, tha ai, për periudhën janar-qershor llogariten 8868, gati 3 mijë më shumë se gjysmën e parë të 2015-s.
“Bizneset e regjistruara neto janë në rritje dhe përkojnë qoftë me indeksin e sipërmarrjes, qoftë me të gjithë indikacionet për rritjen ekonomike të 3-mujorit të parë, por edhe vazhdimësinë pozitive të 3-mujorit të dytë”, tha Ahmetaj.
Kreu i financave publike, po ashtu informoi se në javën e ardhshme qeveria pritet të miratojë dhe dërgojë për shqyrtim në Parlament draftligjin “Për procedurat tatimore”, në të cilin janë propozuar thjeshtime të procedurave tatimore e doganore.
“Ministria e Financave ka në proces një paketë të detajuar të thjeshtimit të procedurave. Ne bëmë një fushatë komunikimi me sipërmarrjen. Kemi marrë 400 sugjerime e propozime për thjeshtimin e procedurave. Shumica e tyre janë reflektuar në draft “, tha ministri.
Ai po ashtu informoi se në fund të muajit tetor do të jetë gati edhe p/buxheti i vitit 2017. (atsh / r.a)
