Sergio Aguero ka deklaruar se synon të largohet nga Manchester City drejt Independientes pasi të skadojë kontrata e tij me klubin anglez në vitin 2019. 27-vjeçari ka nisur karrierën e tij profesionale me Independienten para se të largohej drejt Atletico Madridit në vitin 2006.
Ai thotë se synon të kthehet sërish atje për të përfunduar karrierën në klubin në të cilin ka nisur gjithçka.
“Gjithmonë e kam thënë që dua të rikthehem te Independiente dhe do ta bëj atë”, ka thënë argjentinasi për “So Foot”. “Do të rikthehem te Independiente kur të skadojë kontrata ime me Cityn. Nuk dua të bëj rikthimin kur të jem shumë i vjetër. Nëse gjithçka shkon mirë, do të rikthehem në klubin e zemrës në moshën 31-vjeçare”.
