Kreu i Partisë Agrare Ambientaliste, Agron Duka, është i bindur se në zgjedhjet e ardhshme do të arrijë të rikthejë në Kuvend përmes mandateve forcën politike që ai drejton.
Në një intervistë për revistën “Mapo”, Duka ka shpjeguar pozicionin e tij si opozitar, duke theksuar se forca e tij politike nuk do të vijë në pushtet para datës së zgjedhjeve. Sipas Dukës, programi i PAA-së është serioz dhe i pakonkurrueshëm në kahjen e ekspertizës dhe cilësisë.
Z. Duka, prej vitesh PAA-ja është deklaruar si parti e qendrës, që synon mbrojtjen e interesave të bujqësisë dhe ambientit. Me një profil të tillë politik, duke folur gjithnjë në emër të programit të saj, PAA-ja ka bashkëqeverisur sa majtas, po aq edhe djathtas…
Nën këtë traditë, çfarë qëndrimi do të mbajë PAA-ja në zgjedhjet e 2017-s, me cilën prej forcave kryesore politike në vend do të dalë në zgjedhje?
Ne kemi qeverisur duke dhënë kontribute, duke ofruar alternativa dhe programe, ekspertizë, duke dëshmuar se ne japim cilësi me pjesëmarrjen tonë në një qeverisje. Natyrisht, sot jemi në opozitë dhe zhvillimet politike nuk mund të profetizohen sot, përcaktimet janë gjithnjë në varësi të produktit elektoral, numrave që dalin, mandatet që na japin zgjedhësit e kështu pas tyre mund të flitet për të vlerësuar vullnetin e votuesve tanë, ata na japin qëndrimin dhe ne e lexojmë. Të gjithë e dimë se nuk mbahet shtëpia me miell hua, ne do të prodhojmë rezultatin tonë me pritshmëri të lartë.
Përpos parimeve të shprehura nga kjo forcë politike, bazuar në zhvillimin e qëndrueshëm rural dhe mbrojtjen e mjedisit, a do të shikojë PAA-ja mundësinë e krijimit të një koalicioni të diktuar edhe nga votat?
Vota është mbreti, ne jemi vartës të saj. Por ne jemi së bashku aksionerë në kontratën e besimit që do të vendosim me qytetarët shqiptarë. Duan alternativë, duan një jetë jo si kjo e sotmja, që po vështirësohet me orë dhe jo ditë. Ne kemi biseduar me qytetarët anembanë vendit dhe shqetësimet e tyre janë prioriteti ynë, për t’u dhënë zgjidhje nesër. Mjedisi, bujqësia, agroturizmi, shumë industri të mbështetura në këtë sektor janë lënë jashtë vëmendjes dhe kanë interes sezonal nga pushtetet. Koalicioni ynë është me hallet e çdo qytetari, sepse ky lloj koalicioni ka ndershmërinë dhe qëndrueshmërinë për të sjellë ndryshimet e kërkuara. Ne jemi në opozitë dhe do të vijmë në pushtet, jo para datës së zgjedhjeve.
Pak muaj më parë, PAA-ja “mori” edhe një parti tjetër, Partia Lëvizja Demokratike për Vlera Mirëqenie (që drejtohej nga Arben Tafaj), e cila u shkri në një parti të vetme me Partinë Agrare të drejtuar nga ju… A shihni ju ndonjë tjetër forcë politike në horizont, me të cilën PAA-ja do të mund të realizonte jo vetëm një bashkim numrash apo njerëzish, por edhe një shkrirje organike?
Bashkimi i partisë së drejtuar nga zoti Tafaj me PAA, ishte një veprim politik në harmoni me vlerat që përfaqësojnë dy subjektet tona, duke i dhënë një dimension gjithëpërfshirës projektit tonë politik. Kjo është rruga jonë në të cilën përditë e më tepër vijnë njerëz të profesioneve dhe bindjeve të ndryshme. Ata shohin se liria dhe demokracia brenda nesh ka një qasje tjetër nga partitë e tjera dhe ndihen vetvetja, duke gjetur hapësira për të dhënë kontribute që ne do t’i shndërrojmë në punë konkrete për qytetarët që na besojnë dhe votojnë.
Në zgjedhjet parlamentare të 2005-s, PAA-ja e drejtuar prej Lufter Xhuvelit mori një rezultat të kënaqshëm, që paracaktoi edhe maxhorancën qeverisëse. Por prej asaj kohe, PAA-ja në çdo palë zgjedhje ka shënuar rënie në elektorat. Jeni shprehur se me marrjen e drejtimit të kësaj force politike, ju synoni ta riktheni PAA-në në parti parlamentare. A keni një strategji politike për këtë ambicie, fushata që ju po zhvilloni në bazë, çfarë premton për këtë parti?
Partia Agrare Ambientaliste ka një traditë, ka një marrëdhënie me elektoratin që sa vjen e merr përmasa të reja, në drejtim të rritjes së saj. Ne jemi në fazën e ristrukturimit dhe ju vetë jeni dëshmitarë të përfshirjes në partinë tonë të shumë emrave, figurave intelektuale, politike dhe publike, të cilët na bashkohen. Ne do të jemi një grup parlamentar, me mandate të shtuara në Kuvend, duke përfaqësuar shtresa dhe njerëz të lënë në harresë në shumë vite.
PAA-ja është njohur gjithnjë si forcë politike që ka mbajtur qëndrime të moderuara, ajo nuk ka qenë pjesë e nxitjes së konfliktualitetit, duke arritur, pra, të ruajë profilin e saj politik. Krahas nevojës dhe ambicies së shprehur për ta rikthyer këtë forcë politike në një parti me mandate në Kuvend, a do të ndërhyjë PAA-ja edhe në programin e saj politik? Nëse po, në cilat drejtime konkretisht?
Ne jemi parti që ka në misionin e saj zhvillimin dhe përmirësimin e mirëqenies, rritjen e punësimit, përmirësimin e ndjeshëm të klimës së biznesit. Dhe të gjitha këto nuk mund të bëhen nëse je mbështetës apo ndikues në një klimë konfliktuale. Programi ynë në shumë fusha ku ne kemi targetin tonë identifikues, është serioz dhe i pakonkurrueshëm në kahjen e ekspertizës dhe cilësisë.
Sistemi zgjedhor aktual nuk siguroi një konfiguracion politik dypartiak, për pasojë (pavarësisht nga sa pritej) morën fuqi disa parti të vogla kryesisht ato me prezencë territoriale. Ky proces u implementua edhe në shumicën qeverisëse e përbërë nga më shumë se dy parti. Megjithatë, ky formatim ka krijuar paqëndrueshmëri, me copëtimin e qeverisjes në shumë duar…(edhe pse prania e partive në thelb duhet të sigurojë një qeverisje më demokratike). Si mund të shmanget një fenomen i tillë?
Përqendrimi i pushtetit në sa më pak duar prodhon shpesh një kufizim lirish dhe një funksionim të brishtë të demokracisë. Partitë sado të vogla, kur kanë votat në përfaqësimin e pushtetit, përfaqësojnë qytetarët. Ne kemi identitet, nuk jemi vasalë të askujt, investimi ynë politik është për të kontribuar në një qeverisje të pakorruptuar, e cila t’u ofrojë shërbim qytetarëve dhe jo të vërë qytetarët në shërbim të saj./a.k
