Autoritetet në Gjermani kanë dënuar një ish-punonjës të inteligjencës me tetë vjet burgim, për spiunim për Shtetet e Bashkuara dhe për Rusinë.
Gjykata në Mynih ka shpallur të enjten Markus Reichelin fajtor për tradhti. Reichel, 32 vjeç, ka pranuar se i ka dorëzuar CIA-s mbi 200 dokumente për katër vjet, në këmbim të së paku 80,000 eurove.
Dokumentet kanë përfshirë emrat e vërtetë dhe të fshehur të agjentëve gjermanë jashtë vendit, si dhe adresat e tyre. Ai po ashtu i ka dhënë tre dokumente shërbimit sekret rus. Reichel ka qenë i punësuar në Shërbimin Federal të Inteligjencës (BND) qysh në vitin 2007.
Ai ka punuar në dhomën e postës, ku ka pasur qasje në dokumente të klasifikuara. Reichel është zbuluar dhe arrestuar në vitin 2014, pasi një e-mail i tij për rusët, me dokumente të klasifikuara bashkëngjitur, është zbuluar.
