Babai i Alvin Berishës ka konfirmuar lajmin për lirimin e djalit të tij nga kampi në Siri.
Baba i 11-vjeçarit është shprehur se djali tashmë ndodhet në Damaskë me përfaqësuesit e Hënës së Kuqe.
Afrim Berisha tregon se Alvini ndihej i frikësuar pasi nuk i njihte përfaqësuesit e Hënës së Kuqe.
“Nga dje mbasdite ka dalë nga kampi. Ma kanë dhënë në telefon, kam folur ne telefon me të e më tha: Babi jam duke ardhur. I thashë babi është këtu afër, mos u mërzit ata janë shokët e babit mos u tremb. Edhe sot fola sërish, ai është i trembur se ai nuk njeh asnjë ,nuk e di se ku po e çojnë. I thashë mos u mërzit janë shoket e babit nuk të bëjnë gjë. Tashi do marrin avionin nga Damask për të shkuar në Libi dhe pastaj do më lajmërojnë kur do vijë. Motrat mezi po e presin, po e presin të gjithë.
Faleminderit gjithë shqiptarëve, kushdo që është marrë me këtë punë. Siç janë marrë të gjithë më djalin tim të merren edhe me ata fëmijë që janë atje, të kthehen të gjithë sa më shpejt”, u shpreh babi i Alvinit në një lidhje telefonike me “News 24”.
