Afera e CEZ-it, PD: Në Kushtetuese dhe te ndërkombëtarët
Partia Demokratike njoftoi se do të ndërmarrë javën e ardhshme dy nisma paralele për çështjen e CEZ-it.
Së pari, demokratët do t’i drejtohen Gjykatës Kushtetuese të vendit për të rrëzuar marrëveshjen e shndërruar në ligj nga mazhoranca aktuale për zgjidhjen me mirëkuptim të mosmarrëveshjeve mes qeverisë shqiptare dhe kompanisë çeke, zgjidhje që sipas demokratëve i kushtoi 600 milionë dollarë taksapaguesve shqiptarë.
“Në fillim të javës së ardhshme Grupi Parlamentar i Partisë Demokratike do t’i drejtohet Gjykatës Kushtetuese për të hedhur poshtë ligjin, pra marrëveshjen për zgjidhjen me mirëkuptim ndërmjet Republikës së Shqipërisë dhe CEZ sh. a. Ky akt dëmtoi interesat financiare të shtetit shqiptar dhe ngarkon me borxh të tmerrshëm qytetarët”, deklaroi Eduard Halimi.
Deputeti demokrat bëri me dije edhe hapin e dytë të opozitës, ndërmarrjen e një nisme për hetim ndërkombëtar të aferës në fjalë.
“Po ditën e hënë, Partia Demokratike do të depozitojë në Kuvendin e Shqipërisë projektligjin që bën të mundur hetimin e plotë ndërkombëtar të kësaj afere korruptive”, shtoi Halimi.
