Ish-ministri i Energjisë i qeverisë “Berisha”, Genc Ruli është pyetur përreth një orë në Prokurorinë e Tiranës në lidhje me hetimet e rinisura për çështjen “CEZ”.
Më herët, është thirrur edhe Shkëlzen Berisha për t’u pyetur për këtë çështje, ndërsa pritet që prokuroria të kërkojë edhe dëshminë e shtetasit Nue Kalaj, i cili sipas akuzave të socialistëve ka ndërmjetësuar një takim midis Shkëlzen Berishës dhe ish-drejtorit të CEZ në Shqipëri, çekut Josef Hejsek.
ish-ministri demokrat mbërriti përpara grupit të hetimit rreth orës 18.30, për t’u larguar afro një orë më vonë.
I kontaktuar nga “News 24”, lidhur me këtë çështje Genci Ruli shpjegoi:
“Ishte një sqarim i bazuar në prova reale e të dokumentuara që unë i dhashë Prokurorisë së Tiranës, e cila po heton përsëri çështjen CEZ, për çka lidhet me të ashtuquajtura prova të reja, të paraqitura nga Komisioni Hetimor Parlamentar “Balla”. Shpresoj që dëshmia ime ta ketë ndihmuar hetimin e prokurorisë për të dalluar të vërtetën e dokumentuar nga akuzat qesharake që prodhon kuzhina politike shqiptare”.
Pjesëtarët e grupit të hetimit të dosjes voluminoze, refuzuan të japin detaje, madje nuk konfirmuan as marrjen e dëshmisë së Rulit.
Dosja CEZ u mbajt për afro dy vite më duar nga prokuroria e Tiranës dhe në përfundim firmosi për pushimin e çështjes.
Pak javë më parë, gjykata vendosi ta shfuqizojë vendimin e organit të akuzës dhe ta kthejë sërish çështjen për hetim, duke lënë detyra konkrete për grupin hetimor.
Në këtë kuadër, krahas marrjes së dëshmisë së Shkëlzen Berishës, djalit të ish-kryeministrit Berisha, prokurorët e panë të nevojshme të thërrasin për sqarime edhe ish-ministrin Ruli, emri i të cilit u përmend nga dëshmitari Romeo Kara.
Veprimet hetimore për këtë çështje, po zhvillohen në sekret të plotë dhe larg vëmendjes së medias, e kjo duket nga fakti se prokuroria po shfrytëzon orët e vona të mbrëmjeve, me shpresën për të hedhur dritë mbi aferën korruptive.
