Deputeti Ben Blushi sulmoi sot mazhorancën sa i përket kërkesës drejtuar KQZ-së për të shtyrë afatin e regjistrimit të koalicioneve. Sipas Blushit, koalicioni PS-LSI ka rënë dhe ky është një problem që i përket Ramës dhe Metës.
“Ju kam bërë shumë pyetje këto kohët e fundit, kam edhe një pyetje sot. Sikur t’ju vinin përballë një ligj që parashikon se muaji shkurt nuk ka 28 ditë, por 45 ditë. Do ta votonit ju? Kjo është ajo që po bëni duke ndryshuar afatet zgjedhore me një copë letër. As me ligj jo. Letër që Meta dhe Rama ia kanë çuar KQZ që t’i japi mundësi koalicionit të tyre që të regjistrohet kur të duan ata. Nëse KQZ merr një vendim të tillë, ajo ka rënë sepse vendos që të ndryshojë Kodin Zgjedhor. PD tha nuk njoh 18 qershorin, ju thoni nuk njohim 18 prillin” – tha Blushi.
Deputeti i LIBRA-s tha se procedura është streha e fundit e politikanëve të korruptuar. Blushi akuzoi edhe Gramoz Ruçin që sipas tij i dha Ramës një mandat 7 vjeçar. Sipas tij, afatet e regjistrimit për zgjedhje po shtyhen me një copë letër, sikundër u morën vendimet për kongresin e PS. /javanews/b.d
