Gjimnazistes se shantazhuar me video e foto intime nga 3 adoleshentë që dje u ndaluan nga Policia e Tiranës, iu vodh fjalëkalimi i profilit në Facebook në një qendër interneti, pasi kishte komunikuar me të dashurin e saj në Itali.
Vajza 19-vjeçare, me iniciale E.P., ka bërë një kallëzim më datë 25 mars të këtij viti, duke pohuar se disa persona të panjohur po i bëjnë shantazh për t’i publikuar fotot intime të saj.
Këto fotografi i ishin vjedhur nga profili i saj në Facebook, nga mesazhet që ajo kishte shkëmbyer me të dashurin, i cili jeton në Itali. Në këmbim të mospublikimit të tyre, autorët kërkonin 300 mijë lekë.
Në të kundërt, fotografitë e saj nudo, do t’i postonin në rrjetet sociale. Të dyshuarit, 19-vjeçari Sokol Kraja, i cili u arrestua në zbatim të vendimit të Gjykatës dhe dy 18- vjeçarët E.S. e A.B., që u lanë të lirë, i bënin shantazh 19-vjeçares nëpërmjet adresave të ndryshme fiktive që kishin hapur në Facebook.
Ndërsa burimet thanë se ata kishin arritur të futeshin në profilin e saj, duke i vjedhur fjalëkalimin në një qendër interneti pranë Rrugës së Dibrës, ku ajo kishte qenë para tyre, duke folur me të dashurin që kishte në Itali.
panorama/d.i.
