Komandant i Forcave të NATO-s më seli në Napoli, admirali amerikan, James Foggo, u shpreh i kënaqur të hënën që Kosova dhe Serbia po vazhdojnë bisedimet për normalizimin e marrëdhënieve ndërmjet tyre, por nuk njohuri se si duken planet e presidentit të Kosovës Hashim Thaçi dhe atij të Serbisë, Aleksandër Vuçiç, marrëveshjen e mundshme përfundimtare.
“Kështu që unë nuk e di se si duket ai plan, por këta janë zyrtarët tuaj të zgjedhur. Demokracia ekziston në të dyja anët e kufirit në Kosovë dhe në Serbi dhe këta janë zyrtarët tuaj të zgjedhur në mënyrë të lirë dhe përfaqësojnë interesat e shumicës së qytetarëve të të dy vendeve. Dhe si të gjithë udhëheqësit demokratë, në mënyrë të vendosur besoj që këta dy njerëz janë duke kërkuar zgjidhje për çështje të vështira”, tha admirali Foggo,duke nënvizuar se trupat e NATO-s do të vazhdojnë të mbështesin një mjedis të qetë dhe të sigurt në Kosovë.
“Prandaj jemi këtu dhe kemi forca shumë të afta në Kosovë, më shumë se katër mijë trupa, jemi me ju dhe do të vazhdojmë mbështetjen për një mjedis të qetë e të sigurt dhe lëvizjen e lirë në këtë vend për aq sa mandati ynë do të ekzistojë”, tha ai.
Admirali Fuggo qëndroi të hënën për një vizitë në në komunën e Deçanit me c’rast vizitoi edhe manastirin mesjetar në këtë komunë në Kosovën perëndimore. Drejtuesit e këtij manastiri janë përplasur me udhëheqësit e Serbisë për shkak të debateve të kohëve të fundit rreth normalizimit të marrëdhënieve Kosovë – Serbi që përfshijnë idetë për ndarje tokësore të Kosovës, shkëmbim territoresh e korrigjim kufijsh.
Presidenti i Kosovës, Hashim Thaçi dhe ai i Serbisë, Aleksandër Vuçiç, kërkuan të dielën në një forum në Austri, mbështetjen ndërkombëtare për çfarëdo marrëveshje që arrihet në bisedimet e ndërmjetësuara nga Bashkimi Evropian, qoftë edhe nëse ajo nënkupton ndryshim kufijsh.
Presidenti i Serbisë, tashmë e ka shpallur politikë të tij synimin për ndarjen e ndërmjet serbëve dhe shqiptarëve në Kosovë. Prishtina e ka hedhur poshtë idenë e ndarjes tokësore të saj, ndërsa është përfshirë në debatet e nxitura nga ideja e presidentit të Kosovës, Hashim Thaçi për ‘korrigjimin e kufirit” që sipas tij, nënkupton bashkimin e luginës së Preshevës, një rajon me shumicë shqiptare në jug të Serbisë, me Kosovën.
Të premten, këshilltari për siguri Kombëtare i presidentit amerikan, Donald Trump, John Bolton, tha që se Shtetet e Bashkuara nuk do të përfshihen në idenë për shkëmbimin e territoreve, por nëse palët merren vesh, nuk do të qëndrojnë në rrugë.
Më herët gjatë këtij muaji kancelarja gjermane, Angela Merkel, tha se nuk mund të ketë ndryshime kufijsh në vendet e Ballkanit Perëndimor, një qëndrim që është shprehur edhe nga Britania e Madhe.
Serbia është zotuar se nuk do të njohë pavarësinë e Kosovës që u shpall në shkurt të vitit 2008 me mbështetjen e Shteteve të Bashkuara dhe Bashkimit Evropian. Por, ajo është përshirë në një proces bisedimesh për normalizimin e marrëdhënieve me Kosovën, që është edhe kusht për integrimet evropiane të të dyja palëve.(VOA)
a.ç
