Me një pjesmarrje masive të mijëra qytetarëve të Shkodrës, Voltana Ademi, kandidate e Partisë Demokratike për kryetare e kësaj Bashkie ka hapur në mbrëmjen e 24 majit fushatën elektorale për zgjedhjet e 21 qershorit 2015 me një miting madhështor në sheshin “Nenë Tereza”. Për të mbështetur kandidaten Ademi kanë qenë të pranishëm në miting dhe deputetët Jozefina Topalli, Arben Imami, Helidon Bushati, Irma Kopliku, kryetari aktual i Bashkisë Lorenc Luka, kryetari i PD-së së Shkodrës, Ramiz Çobaj etj.
Për rreth 2 orë, Shkodra është mbuluar nga flamujt blu, fishekzjarret dhe adrenalina e krijuar nga tingujt muzikorë të këngëtarëve të mirënjohur si Rezarta Smaja & Band, Mukades Çanga e Adelina Corraj, nën moderimin e Julian Dedës.
Gjatë fjalës së saj, Voltana Ademi është ndalur tek situata e rendë ekonomike që ka pllakosur Shkodrën për të cilën ajo bën fajtore koalicionin qeverisës. Ajo ka kërkuar mbështetjen e banorëve të Shkodrës duke premtuar më shumë punë, dinjitet dhe mirëqenie.
Mes të tjerave ajo ka shtuar:
“Unë kam punuar gjithmonë në Shkodër. Kam punuar përkrah administratorëve në Bashki dhe Komuna duke u shërbyer njerëzve. Kam avantazhin e madh që përvojën time si Zëvendës Kryebashkiake e Shkodrës e si Prefekte qarku ta vazhdoj sërish nëpërmjet një programi tejet të detajuar për mirëmenaxhimin e administratës lokale. Unë do të jem Kryebashkiake e cila do të jetë pranë e në shërbim të njerëzve! Çdo familjeje, kudo që jeton do t’u ofrojmë të njëjtin shërbim, në kohë, me transparencë e përgjegjësi.
Unë do të kujdesem që çdo qindarkë që vjen nga taksat tona të shpenzohet mirë. Me pjesmarrjen e qytetarëve, me përgjegjësi së bashku ne do të vendosim për çdo investim komunitar.
Unë do t’i shërbej të gjithë qytetarëve në të njëjtën mënyrë, pa marrë parasysh nëse janë nga Bashkia apo Komuna, nëse vijnë nga një parti tjetër politike apo nga asnjë parti politike – unë do të jem atje për t’ju shërbyer ju! Jam këtu për të kërkuar mbështetjen tuaj, për realizimin e projektit tonë për zhvillimin, për bujqësinë, për turizmin, për biznesin, për punësimin, për sigurinë, për mirëqënien!
Për Shkodrën me njerëzit kreativ, historinë e kulturën, mikpritjen e burimet natyrore, një komunitet që jeton e zhvillohet, derë e hapur për integrim!
Më 21 qershor, më të bashkuar se kurrë për të ndëshkuar me votë keqqeverisjen.
Pa dyshim! Për Shkodrën e së ardhmes
Pa dyshim! Për Shkodrën e familjes
Pa dyshim! Për Shkodrën e fëmijëve tanë
Pa dyshim! Për Shkodrën e kulturës dhe traditës
Pa dyshim! Për Shkodrën e miqve
Pa dyshim! Për Shkodrën e Vllaznisë
Pa dyshim! Votoni Partinë Demokratike dhe Alenacën Popullore për Punë dhe Dinjitet” – ka përfunduar fjalën e saj zonja Ademi.
Zyrtarisht fushata sapo ka filluar dhe për rreth 30 ditë, Voltana Ademi ka një punë të gjatë përpara por mitingu i mbremshem duket qartazi se është një premisë tejet pozitive.
