Një kirurg 74-vjeçar është akuzuar në Francë për abuzim me 299 persona, mes të cilëve dhe fëmijë. Joel Le Scouarnec, doli para gjykatës franceze duke marrë të gjithë përgjegjësinë mbi veprimet e tij.
Sipas mediave, mësohet se kirurgu ka abuzuar seksualisht me viktimat, kryesisht rreth moshës 11 vjeç, përgjatë karrierës së tij 30 vjeçare. Këto të dhëna tronditëse, ai i tha para trupës gjykuese në një gjykatë në Vannes të hënën.
“Kam bërë gjëra të tmerrshme. Jam i vetëdijshëm se plagët që kam shkaktuar nuk mund të fshihen dhe as të shërohen”, u shpreh i penduar Le Scouarnec.
Të gjithë fëmijët që ranë pre e këtij abuzimi nuk ishin të vetëdijshëm në momentin që ky kirurg po kryente veprime dyshuese, derisa policia trokiti në dyert e tyre, menjëherë pasi zbuloi emrat në “listën e zezë” të gjetur në shtëpinë e kirurgut francez.
Mediat shkruajnë se këto abuzime kanë ndodhur mes viteve 1989 dhe 2024, në kohën kur Le Scouarnec punonte në dhjetëra spitale private dhe publike në Brittany dhe pjesën tjetër në Francën Perëndimore.
Po ashtu, në kërkimet e bëra nga detektivët, u gjetën hard-disqe që përmbanin më shumë se 300 mijë foto dhe video që tregonin abuzimin e tij me fëmijët, si dhe një shkrim ku ai deklaronte hapur qëllimet e tij.
“Jam pedofil dhe gjithmonë do të jem”, shkruhej në një shënim të gjetur nga zyrtarët e policisë.
