Ilir Meta ka vendosur t’i vijë në ndihmë opozitës dhe pak para nisjes së protestës së kësaj të shtune, ka nxjerrë një deklaratë, në të cilën shprehej se anullon vendimin e mbajtjes së zgjedhjeve më 30 qershor.
Vendimi i Ilir Metës erdhi vetëm pak orë pas kërcënimit të ashpër të SHBA-së ndaj Monika Kryemadhit dhe Lulzim Bashës, se do të përgjigjen nëse pengojnë me dhunë mbajtjen e zgjedhjeve.
Dhe, duke i pasur duart e lidhura nga frika e SHBA-së, opozita ka futur në lojë Ilir Metën, lëvizje kjo që ishte paralajmëruar dhe ashtu siç tha edhe kryeministri Edi Rama, ishte një lëvizje e pritshme.
Por çfarë thotë Kushtetuta në këtë rast?
Kushtetuta e Republikës së Shqipërisë parashikon kompetencën e presidentit për të caktuar datën e zgjedhjeve.
Ajo dispozitë për këto zgjedhje është ezauruar.
E ka bërë efektin e vet ditën që Meta aty ka mbështetur nxjerrjen e dekretit per daten e zgjedhjeve.
Referenca kushtetuese për caktimin e datës së zgjedhjeve të 30 qershorit është konsumuar për këto zgjedhje dhe nuk mund të merret vendim për shfuqizimin e saj.
Kjo dispozitë mund të ripërdoret kur të vijnë zgjedhjet e tjera, por në këto zgjedhje është e pamundur pasi vetë ligji themelor i shtetit nuk e lejon diçka të tillë.
Është sikur nuk ka ndodhur kurrë.
Kështu që nuk dihet se ku e ka mbështetjen ligjore presidenti Meta për këtë vendim.
As ai vetë nuk e di në fakt, pasi nuk ka dhënë argument ligjore, duke thënë se një gjë të tillë do ta bëjë të hënën.
