Përdorimi i inteligjencës artificiale (AI) në polici, diagnostikimin mjekësor dhe reklamat e synuara, mbartin një numër rreziqesh, paralajmëroi rregullatori i BE, duke theksuar se njerëzit duhet të jenë në gjendje të sfidojnë vendimet e automatizuara.
Policia tashmë është duke përdorur gjerësisht potencialin analitik të inteligjencës artificiale dhe aktivistët paralajmërojnë që regjimet autoritare i përdorin ato për mbikëqyrje masive dhe diskriminuese. Ata gjithashtu vërejnë se përdorimi i kësaj teknologjie ndonjëherë shkel të drejtat e njeriut dhe rregulloret e privatësisë së të dhënave, raporton Reuters.
Zyrtarët evropianë duhet të përcaktojnë udhëzime më të qarta mbi zbatimin e rregulloreve ekzistuese në inteligjencën artificiale dhe të sigurojnë që rregulloret e ardhshme të mbrojnë të drejtat themelore të njeriut, paralajmëroi rregullatori Evropian i FRA në një raport të fundit.
“AI nuk është i pagabueshëm”
“Inteligjenca artificiale tashmë po ndikon në jetën e miliona evropianëve,” tha agjencia, duke treguar monitorimin e përhapjes së COVID-19 dhe marrjen e vendimeve për përfitimet sociale.
“Automatizimi mund të përmirësojë procesin e vendimmarrjes, por gjithashtu mund të rezultojë në gabime, diskriminim dhe nganjëherë vendimet e tij janë të vështira për t’u sfiduar,” vë në dukje FRA.
Komisioni Evropian po shqyrton mundësinë e miratimit të një direktive vitin e ardhshëm që do të mbulonte sektorë me rrezik të lartë, të tilla si kujdesi shëndetësor, energjia, transporti dhe pjesë të sektorit publik.
“AI nuk është e pagabueshme, ajo është krijuar nga njerëzit, dhe ata janë të gabueshëm. Kjo është arsyeja pse ata duhet të dinë se kur (inteligjenca artificiale) po përdoret, si funksionon dhe si mund të sfidojnë vendimet e automatizuara,” tha Michael O’Flagerty, drejtor i Agjencisë së BE për të Drejtat Themelore.
Nevoja për kërkime shtesë
Rregulloret që rregullojnë AI duhet të respektojnë të gjitha të drejtat themelore të njeriut, me masa mbrojtëse të përshtatshme dhe një garanci se njerëzit mund të sfidojnë vendimet që merr inteligjenca artificiale dhe që kompanitë duhet të jenë në gjendje të shpjegojnë procesin.
Nevojiten hulumtime të mëtejshme në lidhje me pasojat potencialisht diskriminuese të përdorimit të inteligjencës artificiale në mënyrë që Evropa të arrijë hapat, tha FRA në një raport.
BE-ja gjithashtu duhet të sqarojë më tej se si zbatohen rregulloret e mbrojtjes së të dhënave për këtë teknologji.
Raporti i agjencisë bazohet në më shumë se 100 intervista me organizata të sektorit publik dhe privat që tashmë përdorin AI, ku analiza bazohet në përdorimin e teknologjisë në Estoni, Finlandë, Francë, Hollandë dhe Spanjë.
