Nga Frrok Çupi
Për nga gjasat e tanishme, duket se herë është zot e herë pak më shumë se ‘zot’. Zotave njeriu u ka caktuar nga një fron, edhe ky virus- njësoj si Zeusi- e ka Olimpin e vet; sytë e shtatë miliardëve u janë drejtuar Kinës . Për nga vetmia e përkorë e zotave, kësaj here Dita e Pashkëve u vendos në tempullin të vetmisë, pa besimtarë.
Strategët e luftës kundër Virusit i kanë bërë një favor kësaj krijese mitike; duke dashur ta izolojnë- në fakt kanë mbyllur në shtëpi virusin të vetëm me njeriun. Virusi, njësoj si Zoti, nuk gjendet në rrugë, as në park, as në ajër (siç edhe deklarojnë qeveritë), atëherë ka hyrë në shtëpi.
… Për nga besimi se ‘ky zot’ do ta bëjë botën më të mirë- edhe kjo ide është krijuar si një Apollo; sapo zoti i mirë të kalojë këndej do t’i sjellë njerëzimit atë që i mungon në palcë: Të vërtetën profetike dhe drejtësinë, muzikën, shërimin përmes rrezeve të diellit. Njerëzit kanë nisur të dridhen nga frika se pas ‘zotit virus’ do të mbijetojnë apo shtohen mëkatet dhe padrejtësia. Sapo kishin nisur shpresën në Drejtësinë e re, por tani vallë a do të kemi drejtësi? Reforma ka stopuar, Venecia bën lajka alias-evopiane herë me viktimat e herë me presidentin. Prokurorët e rinj që kanë frikë nga virusi, vallë sa trima do të jenë për të luftuar krimin? Kryeministri që mbante shpatën e Demokleut të Reformës në Drejtësi- duket se po qullet nën qurravitjet e gota-rakive dhe të opozitës. Njerëzit kishin nisur të besonin se ‘katallanët’ që grabitën pasurinë- mund ta kthenin ku e kishin marrë- në popull. Patën nisur të besonin te Amerika. A vallë do të tradhtojë ‘Apolo’ dhe do t’i bashkojë prapë drejtësinë me padrejtësinë? Virusi është zoti i keq që mund të kthejë lumenjtë e jo më drejtësinë.
Për nga shpresa- Virusi do të ndërtojë disa balanca, si zoti Hermes. Hermes është quajtur zot i tranzicionit dhe i kufijve; ky ‘zoti virus’ nuk do të na lejojë të kthehemi në tragjeditë tona, apo do të hapë rrugët për në atë ferr?. Përnatë dëgjojmë se janë fshehur kufomat në disa tunele, ’ta dini ju sa kufoma’ janë, njëqind fish i atyre që shikoni (!). Këtë po thonë. Njeriu nuk ka si të jetë aq i zi sa t’i shpikë këta numra kufomash, por me siguri është ëndrra e keqe e njeriut që i ka parë një herë skenat makabre. Janë parë në vitin 1997, janë parë në burgjet e diktaturës… Këta që i shtijnë njeriut frikën në zemër, duan që përmes zotit të Frikës, ta marrin edhe një herë fatin e kombit në dorë…, dhe atëherë zoti nuk i ngjan më as Hermesit e asnjë zoti tjetër të mirë.
Se çfarë do të ndodhë me dhe pas Virusit, asnjë zot nuk e di. Njerëzit më me shpresë po mendojnë se virusi ‘do t’i qërojë’ banditët në politikë, perversët në rrugë e në media, vrasësit në pusi dhe në familje. Në fakt në mediat e botës po qarkullojnë paradigma se para kësaj tragjedie botërore njeriu do të bëhet më i mirë; por kush është i sigurt. Ka edhe një hendek tjetër vlere në këtë çmim: Prej 30 vjetësh që u radhitën pas 45 të tjerëve…, njerëzit kanë pranuar dhunën, padrejtësinë dhe grabitjen.., vallë te virusi molekular i paska mbështetur kombi shpresat për ndryshim!? Kjo është aq tragjike sa ke frikë ta mendosh.
Jeta jonë, me këtë rast, ka ndryshuar- kjo është e vërteta.
Por asnjë zot, që prej Zeusit, nuk mund të thotë se në ç’rrugë. Deri tani, që prej fillimit të marsit, shumëkush ka kuptuar se jeta në vetmi nuk është fundi i botës- përkundrazi është ajo që në Britani po e quajnë “Arti i vetmisë’. Ndoshta mund të shtohet me të tjerë shtresa intelektuale, se që të rrënohet më shumë- kjo është e pa mundur. Ndoshta nuk do të ketë më nevojë për votime, edhe për disa vite- të paktën. Ata që iu bindën qeverisë, ata u mblodhën në shtëpi kinse kundër virusit- por në fakt këta janë që do të votonin ‘pro’. Atëherë pse të votohet, për ata që nuk luajtën veshin as veshën një bluzë të bardhë; dhe që nuk i ndoqi njeri as në show? Ndoshta do ta çmojmë punën dhe frytet që prodhojmë vetë, se kush pret të na vijnë mollët nga Maqedonia? Ndoshta që këtu nuk do të akuzojmë më të huajt për dështimet tona, siç akuzuam Amerikën në mars ’97. Edhe shqiptarë në Kosovë sot po luftojnë Amerikën, por ditën e fundit nuk do të jetë kështu. Ndoshta po riformatohet Evropa ku bëjmë pjesë dhe, në vend të globalizmit (që më shumë është ajër i padukshëm si virusi), do të kemi shtete kombe…
Asnjë zot nuk e di saktësisht çfarë.
Sidoqoftë, jemi kthyer në epokën e ‘nominimit’ prej njeriut të disa zotave dhe nuk do të besojmë vetëm njërin prej tyre. Athina kishte dhjetë, ndërsa Kina i origjinës së virusit- dyqind. Me sa duket ne do të vazhdojmë të jetojmë bashkë me virusin për një kohë të gjatë, domethënë me ‘regjimin e Covid’.
