Kjo foto e fiksuar në ambjentet e morgut të Tiranës, ka sjelle reagime të ashpra në rrjetet sociale dhe media të ndryshme.
Pasi u bë publike, në komente thuhej se brenda çarçafit, ndodhet trupi i një foshnjë i lënë aty shkujdesur.
Por, në foto nuk duket qartë nëse vërtet kemi të bëjmë me trupin e një foshnje.
Pas komentimit të gjerë të çështjes, ka ardhur edhe reagimi i Mjekësisë Ligjore pranë Ministrisë së Drejtësisë, që rrëzon këto pretendime dhe sqaron se kemi të bëjmë vetëm me mbetje tekstilesh nga një tjetër rast.
Ja reagimi i plotë i Ministrisë së Drejtësisë
Ditën e djeshme, datë 19.11.2015 nga salla operative e policisë jemi njoftuar se në ambjentet e një apartamenti në zonën e Astirit është gjetur e vdekur një bebe dhe ngjarja përbënte një rast mjeko-ligjor,
Në orën 18:20 ka mbërritur foshnja pranë morgut qendror në Institutin e Mjekësisë Ligjore dhe në momentin që ambulanca ka mbërritur, të pranishëm ishin Eksperti Mjeko-Ligjor dhe Prozektori i turnit.
Rasti është pritur konform të gjitha rregullave të parashikuara dhe foshnjës i është kryer autopsia në prezencë të ekspertit kriminalist, oficerit të policisë gjyqësore dhe ekspertit mjeko-ligjor
Në lidhje me imazhet të cilat janë publikuar në media gjejmë rastin t’ju informojmë se nuk janë imazhe të bebes por thjesht një material tekstili, i cili ishte lënë aty nga një rast i mëparshëm i transportuar nga QSUT.
Shprehim keqardhjen për këtë keqkuptim dhe kërkojmë bashkëpunimin tuaj për paraqitjen me vërtetësi të kësaj ngjarje, e cila mund të verifikohet me prova dhe fakte.
Duke ju falenderuar për bashkëpunimin,
Dr. Bledar XHEMALI
D R E J T O R I
