Mes demokratëve kishte më shumë zëra të ngjashëm me atë të Blushit, por në takim munguan vetëm dy. Njeri prej tyre është Genc Ruli, pavarësisht se deklaroi votën pro reformës.
“Partitë shqiptare kanë shumë mënyra për të shprehur vullnetin për reformën në drejtësi dhe nuk ka nevojë për takime butaforike me ambasadorët”, deklaroi Ruli.
Deputeti tjetër që mungoi në takimin me ambasadorët ishte Sali Berisha. Ish-kryeministri, i cili orienton vendimet e demokratëve për çështje të rëndësishme, zgjodhi të mos ishte dëshmitar, por të ruajë pozicionin e një prej lojtarëve në mungesë.
“Mungesa e zotit Berisha në mbledhje është normale, pasi ai ka takime konstante me ambasadorët për reformën në drejtësi, ndërsa mbledhja është për të njohur deputetët e tjerë të PD-së”, thanë burime të afërta me Berishën.
Në mungesë po luan edhe Ilir Meta, i cili ndodhet për një vizitë në Uashington dhe as ai nuk u bë dëshmitar i betimit amerikan të deputetëve të LSI-së për votimin e reformës.
Ndërsa Jozefina Topalli zgjodhi që të mos e prishë protokollin e takimit, por edhe as imazhin e besnikërisë ndaj Berishës dhe u largua nga takimi me ambasadorët ende pa u mbyllur mbledhja. “Unë kam takime me ambasadorë të tjerë”, tha ajo për mediat.
Por Topalli nuk u largua pa dëgjuar shpjegimin e ambasadorit amerikan për kritikën e saj dhe të kolegëve për vijën e famshme.
“Nuk do të ketë kapërcim të vijës së kuqe. Prania ime është shprehje e rëndësisë së reformës. Ne nuk ju japim urdhra. Jemi përgatitur për të qenë konstruktivë”, u shpreh ambasadori Lu.
Konstruktivitetin ambasadorët e përkthejnë, në çdo rast, në një votë pro për reformën në drejtësi. Por a i kanë ambasadorët 94 votat për miratimin e ndryshimeve kushtetuese, nëse partitë nuk gjejnë konsensus?
Nga ajo çfarë u ka thënë me dyer të mbyllura socialistëve dhe demokratëve Donald Lu lë të kuptohet se po. “Të hënën u dha një shenjë e mirë që Partia Demokratike votoi në parim pro reformës. Është shumë e rëndësihme që reforma të mos kalojë vetëm me votat e mazhorancës, por edhe të Partise Demokratike”, tha Lu.
Dhe mes të pathënave dhe të pabërave në publik, tashmë mbetet akoma enigma, jo kur por nëse reforma do të kalojë. Por së paku, tani apeli për mungesat është bërë. tch/ a.k
