Ndryshe nga shumë vende të tjera të botës që kanë një hotel karantine për turistët që ndodh të infektohen me Covid-19 në një shtet të huaj, Shqipëria jo vetëm që nuk e ka një të tillë por hotelet nuk kanë as edhe një protokoll shqiptar se si duhet të veprojnë në këtë rast.
Gazeta “SI” kontaktoi me “Shoqatën e Hotelerisë dhe të Turizmit” e cila u shpreh se në mungesë të një protokolli shqiptar për hotelet se si duhet të veprojnë në një rast të tillë, atyre u mbetet vetëm të ndjekin protokollin zyrtar global që është për të gjithë rrjetin e hotelerive.
Të njëjtën gjë pohoi për Gazetën “SI” edhe Shoqata Shqiptare e Turoperatorëve ku menaxhimi i situatës mbetej në dorë të stafit të hotelit për sa kohë që nuk ka udhëzime të qarta vetëm për Shqipërinë.
“Deri tani në dijeninë time nuk kemi patur ndonjë rast specifik të një turisti i cili është infektuar dhe është karantinuar në hotel por me aq sa jemi të informuar mbetet në dorën e gjithë secilit hotel të vendosë se si duhet të veprojë me rastin e një turisti të infektuar.
Nuk ka një protokoll të përbashkët shqiptar për të gjithë hotelet për një situatë të tillë.”-citoi për gazetën “SI”, Besnik Vathaj, tur-operator.
Nga ana tjetër, Albana Fico drejtoresha e ISHP tha se nëse një turist infektohet me Covid-19, duhet të karantinohet menjëherë në hotel dhe sipas saj monitorohet nga mjekët në hotelin ku qëndron. Ai trajtohet njëlloj si një shtetas shqiptar dhe nëse ka nevojë për trajtim spitalor shpenzimet i mbulon shteti.
Por në “Menaxhimin e Covid-19 në sektorin e akomodimit”, protokolli zyrtar i OBSH-së, theksohet se nuk rekomandohet qëndrimi i turistit të infektuar në hotelin se ku është akomoduar.
Gjithashtu, Gazeta “SI” konfirmoi në komunikim me disa nga hotelet shqiptare që asnjë prej tyre nuk ka një mjek specifik posaçërisht për hotelin dhe se në raste edhe sëmundjesh të zakonshme, turistët apo klientët i drejtohen qendrës shëndetësore përkatëse për secilën zonë.
Ata thonë se nuk kanë asnjë informacion nga autoritetet lokale shëndetësore se si duhet të veprojnë në një rast të tillë dhe disa prej tyre nuk ishin as të informuar që ekzistonte një protokoll botëror.
“Hoteli ynë është i ri dhe ne jemi përpjekur që përgjithësisht të kemi turistë të huaj por nuk kemi asnjë protokoll shqiptar dhe as të huaj se si duhet të veprojmë. Mendoja që është në dorën e turistëve për sa kohë që askush nuk na informoi nëse duhet të marrim masa ne apo autoritet shëdetësore”, tha për Gazetën “SI” përfaqësuesi i “Wait and Sea Hotel”.
Protokolli i OBSH thekson se në mungesë të një hoteli karantine, turisti i infektuar duhet të izolohet i vetëm në një dhomë që mundësisht është larg dhomave të tjera të zakonshme si dhe duhet të ketë edhe një tualet tërësisht personal.
Në shërbim të tij duhet të jetë vetëm një mjek i cili duhet të ndalojë të gjitha vizitat e tjera të familjarëve apo të stafit të hotelit dhe se duhet të jetë i pajisur me veshjen speciale në momentin që ai do të futet në dhomën e tij.
Ndryshe nga Albana Fico, protokolli zyrtar i OBSH thekson që stafi i hotelit nuk ka tagrin e duhur që të detyrojë turistët e infektuar të karantinohen në dhomë ose të mos lejojnë vizitat e të afërmve për ta. Kjo gjë mbetet tërësisht në zgjedhjen personale të turistit dhe të autoriteteve shëndetësore lokale ose kombëtare. Ata gjithashtu duhet të marrin përgjegjësinë për t’i karantinuar në një hotel ose në një tjetër hapësirë të ngjashme të dedikuar personalisht për ta sepse kjo gjë rrezikon të infektojë zinxhir të gjithë stafin e hotelit, duke nisur nga recepsioni deri tek pushuesit e tjerë.
Organizata Botërore e Shëndetësisë që nga fillimi pandemisë ka raportuar se rastet e dyshuara me COVID-19 duhet të izolohen dhe monitorohen në këto kushte të veçanta.
Gjatë mbledhjes së fundit të Komitetit Teknik të Ekspertëve Shefja e Shërbimit të Epidemiologjisë në ISHP, Silva Bino, tha se rastet e ardhura të konfirmuara me variantin Delta ishin përkatësisht: dy raste nga Britania e Madhe, dy nga Gjermania dhe nga një nga Spanja, Çekia, Maqedonia e Veriut dhe Pakistani, ky i fundit pa shenja klinike.
Qeveria thotë që shpenzimet i mbulon shteti, Shoqata e Hotelerive pohon se nuk ka një protokoll shqiptar ndërsa hotelet tregojnë se nuk janë të informuar se si të veprojnë në një situatë të tillë, e përveç mungesës së informacionit, dukshëm kanë edhe mungesën e mjekëve për të cilët OBSH-ja thekson në protokoll se duhet të jenë absolutisht të pranishëm në secilin prej tyre. /m.j
