Përpara Komisionit të Pavarur të Kualifikimit ka dalë sot Fatmir Hoxha, anëtar i Gjykatës Kushtetuese prej vitit 2011. Nga rivlerësimin që i është bërë pasurisë së tij, Komisioni ka dalë në përfundimin se ai nuk justifikon mënyrën e blerjes së një apartamenti në Tiranë 112 metra katror në vlerën e 140 mijë Eurove. Vetë gjyqtari nuk ka marrë pjesë në seancë, por avokati i tij tha se ai paratë i ka marrë borxh nga kunati ndërsa pjesën tjetër me kredi. Komisioni i Pavaraur i Kulifikimit nxorri edhe disa llogari të tjera bankare që sipas tij nuk justifikohen. Pritet që pas dëgjimit edhe të pretendimeve të gjyqtarit, KPK të marrë një vendim.
Duke folur për gazetarët, avokati shpjegoi se gjyqtari Fatmir Hoxha u transferua nga Shkodra në Tiranë kur u emërua anëtar i Gjykatës Kushtetuese në vitin 2011, dhe shiti shtëpinë për të blerë apartament në kryeqytet. Për blerjen e saj, mori edhe një kredi dhe një shumë parash borxh nga kunati i tij.
“Nga 2011 është emëruar anëtar u Gjykatës Kushtetuese dhe është transferuar nga Shkodra ku ka pasur banesë, të cilën e ka shitur. Është ende një borxh që po shlyhet së bashku me kredinë e marrë. Kredia është marrë në vitin 2007. Për të blerë banesën, është dhënë miratimi. Borxhi që i ka marrë kunatit, është marrë për të njëjtat arsye dhe deri më sot është shlyer. Nuk ka asnjë pasuri tjetër”, ka thënë avokati i tij.
Hoxha është gjyqtari i pestë i Kushtetueses që përfshihet në procesin e vetingut. Besnik Ymeraj dha dorëheqjen nga sistemi gjyqësor, por u referua nga Komisioni i Pavarur i Kualifikimit në Prokurori, Fatos Lulo dhe Altina Xhoxhaj u shkarkuan nga detyra, ndërsa Vitore Tusha është e vetmja e konfirmuar në detyrë deri më tani.
/a.m.
Skeda/ Gjyqtari i Kushtetueses deklaron 232 milionë lekë, si u pasurua Fatmir Hoxha
