“A Bigger Splash” i regjisorit italian, Luca Guadagnino, rirealizim i filmit francez të vitit 1969 “La Piscine” (Pishina) për një trekëndësh vicioz dashurie, e transferon ngjarjen në ishullin italian mesdhetar, Pantelleria. Vala e emigrantëve dhe refugjatëve që kanë zbarkuar në Evropë ose kanë vdekur gjatë përpjekjeve të tyre për të arritur aty nuk e ka goditur Lidon, ku po mbahet edicioni i 72-të i Festivalit të Filmit në Venecie, por po e prek këtë temë nëpërmjet filmave që po shfaqen dhe në kuadër të diskutimeve për ta. “A Bigger Splash” e ka një pjesë në të cilën përfshihen njerëzit që kanë ardhur në bregun e Pantellerias, shkruan Reuters.
Filmi sjell informacione të shkurtra të marra nga transmetuesit televizivë që bëjnë fjalë për refugjatët dhe emigrantët që kanë zbarkuar në Lampedusa. Po ashtu shfaq pamje të një grupi refugjatësh të fshehur në kodrat e Pantellerias dhe të atyre në një zonë të rrethuar pranë stacionit lokal të policisë.
