Këtë herë duhet të jetë e treta e vërteta. Skënder Gega, i cili riktheu pas 26 vitesh titullin kampion te Partizani, sezonin e ardhshëm do të drejtojë Kukësin.
Burime pranë SuperSportit kanë mësuar se presidenti Safet Gjici dhe tekniku 56-vjeçar janë në bisedime prej disa ditësh e palët këtë herë duket se nuk do të bëjnë prapaktheu në momentin e fundit, siç ka ndodhur të paktën në dy raste. Kuptohet që Orges Shehi, i cili nuk i arriti objektivat që kishte kur u emërua trajner i verilindorëve do të hapë krahun.
Në fakt, pritet vetëm zyrtarizimi i marrëveshjes pasi janë përcaktuar të gjitha detajet për të cilat palët janë në dakordësi të plotë. Gega mësohet se do të marrë menjëherë frenat e Kukësit, për të nisur përgatitjet për sezonin e ri, ku impenjimi i parë do të jetë në Europa League.
Një lajm i mirë për tifozët kuksianë, por i hidhur për mbështetësit e kuq, të cilët prej më shumë se një vitit u kanë kërkuar drejtuesve nëpërmjet qëndrimeve të tyre në rrjetet sociale që të rikthejnë Skënder Gegën në stol, të cilit i atribuojnë suksesin e arriti një vit më parë.
