Ministrja e Shëndetësisë Ogerta Manastirliu ka raportuar në komisionin e Shëndetësisë për masat që janë marrë ndaj gripit dhe koronavirusit nga institucioni që ajo drejton. Gjatë fjalës së saj Manastirliu tha se dhomat e izolimit janë funksionale dhe se janë kushtet për t’u vendosur karantina në vend.
‘’Dua që të informoj komisionin se nga ISHP janë realizuar të gjitha trajnimet për specialistë në të gjitha strukturat e kujdesit parësor.
Edhe ne spitale janë marrë masa dhe dhomat e izolimit janë funksionale nëse ka raste për të dyshuarit me koronavirus.
Ka 5 raste te dyshuara me një histori udhëtimi me Kinën të cilët janë testuar dhe kanë dalë negative.
Pra deri më tani Shqipëria nuk ka asnjë rast të konfirmuar me koronavirus.
Shërbimi infektiv është pajisur me të gjitha mjetet e mbrojtjes personale.
Kemi dhe një strukturë prites për karantinë në vend, vendi është i përcaktuar me kushtet më të mira.’’, deklaroi Ogerta Manastirliu.
Në Komisionin e Shëndetësisë në Kuvend, ministrja deklaroi se Ministria e Shëndetësisë dhe Mbrojtjes Sociale ka marrë një seri masash për t’i paraprirë viruseve stinore.
“Kemi kryer në kohë vaksinim për rreth 80.000 qytetarë, kryesisht të sëmurë kronikë, gratë shtatzëna, fëmijët 2-5 vjeç, personelin shëndetësor”, tha Manastirliu.
Ministria e Shëndetësisë dhe Mbrojtjes Socile i ka paraprirë situatës në të cilën jemi, ku fluksi është shumë i lartë, duke hapur 4 qendra shëndetësore 24 orëshe në Tiranë, në Kombinat, Laprakë, në zonën e ish-Bllokut dhe zonën e Oxhakut, për të shfryrë fluksin në Urgjencën Pediatrike të QSUT në mënyrë që qytetarët të mos presin në rradhë të gjata, po ta marrin shërbimin afër vendbanimit, në kohë dhe me cilësi.
g.kosovari
