Për akuzat ndaj ish ministrit të Brendshëm, Saimit Tahiri ka reaguar nje prej deputeteve te PS-së, e cila i kundërvihet po me akuza kreut të opozitës, Lulzim Basha.
Nënkryetarja e grupit të PS-së Elisa Spiropali reagoi sot pas deklaratave të tij lidhur me lajmin e publikuar nga mediat italiane për arrestimin e Moisi Habilajt, për të cilin, kreu i PD, thotë se është i afërmi i ish-ministrit të Brendshëm Saimir Tahiri.
“Humbësit serial Lulzim Basha i kujtohet që është kryetar opozite sa herë merr habere trafikimi e arrestimi! Për çdo të arrestuar ky gjen lidhje me Edi Ramën; zbulon kushërinj deputetë; akuzon kundërshtarë politikë. Për çdo plagë të vjetër, ky e ve gishtin tek qeveria e re! Lum si ky njeri! Nuk merr asnjë përgjegjësi si shqiptar, qytetar, politikan, kryetar, por ngaqë s’ka çfarë të bëjë tjetër ngaqë shqiptarët i besuan çelësat e kashtës, nis e bën qysh tani një gjë që duhet ta bëjë të paktën pas tetë vitesh, fushatë elektorale jashtë kohe me shpresë se në këtë mënyrë do vijë në pushtet pas nja 16 vjetësh. Lul Basha ka shkëputur komplet lidhjet me orën dhe busullën, kohën dhe hapësirën. Që Lulzim Basha është fatkeqësia e Partisë Demokratike e kanë thënë themeluesit e PD me zë e me figurë. Po qenka më keq. Nga humbja në humbje, po kthehet në fatkeqësinë e institucionit të opozitës“, shkruan Spiropali./a.m.
