Në Muzeun e Artit Mesjetar në Korçë, inaguruar vetëm pak kohë më parë është instaluar tashmë pajisja e cila do të dezinfektojë të gjitha ikonat e këtij muzeu, por edhe të tekstileve, objekteve të letrës e drurit. Për këtë është zhvilluar edhe trajnimi i stafit restauratori austriak, Nikolas Wilke, i cili tregon se pajisja dezinfektuese do të garantojë jetëgjatësinë e të gjitha objekteve unikale që ndodhen në muzeun e artit mesjetar, ndërsa e quan një nga muzeumet më të bukur që ka parë në jetën e tij.
Kjo pajisje dezinfektuese funksionon jo me helme apo pesticide, por duke rritur temperaturën e objektit deri në 51 – 55 gradë C dhe lagështia e objektit mbahet konstante në vlerat e paracaktuara nga ekspertët. Kohëzgjatja e një procesi është 18 – 24 orë.
Deri tani janë dizinfektuar mbi 500 objekte të ndryshme të muzeut, i cili është më i veçanti në vend sa i përket numrit të madh të mjeshtrave, autorëve të ikonave (rreth 10 mjeshtra të ikonografisë) dhe larmisë së fondit të objekteve që administron (8000 objekte të Artit Mesjetar, ndër të cilat 6500 janë ikona)
Në godinën e re të muzeut janë të ekspozuara rreth 400 ikona
Prezantimi i trashëgimisë së Artit Mesjetar të rikthen në gjenezën e mistikes dhe ritualeve të shenjta./a.m.
