Procesi i numërimit vazhdon ende në 6 bashki të vendit edhe pse kanë kaluar48 orë nga mbajtja e zgjedhjeve vendore.
Në Tiranë janë numëruar më shumë se 95% e votave, por janë ende 37 kuti për t’u numëruar. Aktualisht vazhdon procesi i numërimit, megjithëse me ritme të ngadalta. Kandidati i kolalicionit të majtë, Erion Veliaj udhëheq bindshëm me rreth 41 mijë vota diferencë nga kandidati i APPD, Halim Kosova.
Rreth 66% e votave janë numëruar në Bashkinë e Durrësit. Edhe këtu kandidati i ASHE, Vangjush Dako ka krijuar epërsi ndaj rivales Grida Duma, me diferencë rreth 10 mijë vota. Edhe në këtë bashki vazhdon të numërohet, por me ritme të ngadalta.
Një tjetër bashki e madhe ku ende nuk ka përfunduar numërimi është ajo e Shkodrës, ku procesi nisi vetëm gjatë mëngjesit të së hënës. Deri në orët e para të së martës janë numëruar rreth 45% e votave, ku kandidatja e APPD, Voltana Ademi ka marrë 27 mijë vota, ndërsa rivalja e saj, Keti Bazhdari ka marrë rreth 19 mijë të votave. Edhe këtu diferenca duket e madhe megjithëse ende nuk janë numëruar gjysma e kutive të votimit.
Në Bashkinë e Kamzës janë numëruar rreth 70% e votave dhe gara është vërtetë e ngushtë mes Xhelal Mziut të APPD dhe Safet Gjicit të ASHE. Kandidati aktual i bashkisë, Mziu kryeson me rreth 1300 vota.
Në Berat kanë mbetur vetëm 16 kuti për tu numëruar, por ky proces është ndërprerë pak para mesnate dhe pritet të fillojë në rreth orës 08:00. Kandidati i ASHE, Petrit Sinaj kryeson me një diferencë prej 1600 votash ndaj Kasëm Mahmutaj të APPD-së.
Një tjetër bashki ku procesi i numërimit ende nuk ka përfunduar, madje janë numëruar më pak se në çdo bashki tjetër, është Malësia e Madhe. Ku deri në orët e para të së martës janë numëruar rreth 44 përqind të vota dhe gara është shumë e ngushtë. Tonin Marinaj i ASHE kryeson me vetëm 329 vota.
