Ministria e Mbrojtjes ka reaguar pas përhapjes së lajmit për ttransportimin e municioneve të rrezikshme nga Rinasi në Kuçovë. Nëpërmjet një njoftimi të shpërndarë për mediat Ministria e Mbrojtjes sqaron se bëhet fjalë për transport skrapi, mbetje nga serbatorët e avionëve MIG të dalëjashtë kontrollit.
Deklarata e MM:
Materialet që po transportohen nga Rinasi në Kuçovë, serbatorë karburanti të aeroplanëve MIG. Nuk përbëjnë rrezik.
Në përgjigje të shqetësimit të disa qytetarëve, përsa i përket materialeve të paraqitura media si të rrezikshme, bëjmë me dije për opinionin publik se:
Bëhet fjalë për transport materialesh, kryesisht skrap, nga Rinasi për në Kuçovë, nga Forcat Ajrore.
Më konkretisht sqarojmë se, nuk bëhet fjalë për predha apo materiale të rrezikshme, po për serbatorë karburanti të aeroplanëve, tashmë të dalë jashtë përdorimit si “MIG” etj., të cilët i nënshtrohen protokollit të transportit të zakonshëm, pasi nuk përbëjnë asnjë rrezik për popullatën apo ambientin.
Forcat e Armatosura të Republikës së Shqipërisë për transportin e materialeve të rrezikshme si municione, kimikate etj., kanë procedura shumë të qarta dhe strikte, të miratuara nga Ministri i Mbrojtjes dhe referuar standardeve e vendeve të BE, në të cilat në çdo rast veprohet dhe zbatohet me rreptësi protokolli i miratuar.