Një konfrontim mes shqiptarëve dhe serbëve ka ndodhur mbrëmë rreth orës 22:00 tek ura kryesore e Ibrit në Mitrovicë, që për pasojë ka lënë disa persona të lënduar.
Ndihmë mjekësore në spitalin e veriut të Mitrovicës, pas përleshjes kanë kërkuar Strahinja Barbullov (1993) nga qyteti i Kikindës të Serbisë dhe Dushan Ivkoviq (1993) nga Leskovci, po ashtu qytet në Serbi.
Nuk dihet motivi i kësaj rrahje, por mësohet se ka pasur edhe të lënduar tjerë nga të dyja palët, të cilët nuk janë paraqitur fare për trajtim mjekësor.
Zëdhënësi i policisë në jug të Mitrovicës, Avni Zahiti, ka thënë për kp se nuk është në dijeni për një incident të tillë, dhe se nuk është raportuar të ketë ndodhur diçka e tillë sa i përket pjesës jugore të qytetit.
Zona e përgjegjësisë së policisë në Mitrovicë ndahet me urë, përkatësisht mesi i urës përcakton jugun dhe veriun e këtij qyteti, ku vazhdimisht qëndrojnë patrulla policore në të dyja anët e urës./a.m.
