Raquel Amado, që përfaqëson palën akuzuese në seancën gjyqësore ndaj Lionel Messit për evazion fiskal, ka kërkuar që futbollisti më i mirë në botë të shpallet i pafajshëm, por jo edhe babai i tij, Jorge, raporton “Mundo Deportivo” të premten, shkruan Koha Ditore.
Sipas kësaj gazete, prokurori Amado ka thënë në gjykatë të premten, në ditën e fundit të seancës gjyqësore, se nuk ka dëshmi që ylli i Barcelonës ka ditur për skemat për të bërë evazion fiskal në vlerë prej katër milionë eurosh në të drejtat e tij të imazhit dhe për këtë arsye duhet të shpallet i pafajshëm, pwrgatiti Koha.
Mirëpo, për babanë e Lionel Messit, Jorge, që po ashtu është duke u gjykuar për rolin e tij në këto marrëveshje jashtë vendit, është kërkuar burg për disa muaj, që mund të jetë deri në 18 muaj, pasi që ishte në dijeni për rrjetin e llogarive në Belize dhe Uruguai.
Lionel Messi të enjten ka dëshmuar para gjykatës, duke thënë se nuk është interesuar për marrëveshje financiare, pasi ia ka përkushtuar gjithë kohën futbollit.
“Unë nuk kam ditur asgjë. Unë interesohem vetëm për të luajtur futboll”, ka thënë Messi. (b.an)
