Çdo minutë 10 milionë duhanpirës ndezin një cigare dhe 15 njerëz vdesin nga duhani. Shifrat janë bërë publike në kuadër të Ditës Botërore kundër Duhanit.
Sa janë duhanpirësit?
Nga 8 miliardë njerëz në Tokë, rreth 1 miliard janë duhanpirës, sipas Organizatës Botërore të Shëndetësisë dhe The Tobacco Atlas.
Më shumë se 5,000 miliardë cigare konsumohen çdo vit, sipas The Tobacco Atlas, një qendër informacioni për duhanin e organizatës joqeveritare amerikane Vital Strategies dhe Universitetit të Illinois në Çikago.
Numri i duhanpirësve është në rënie prej disa vitesh falë masave kundër duhanit të miratuara nga shtetet, si rritja e taksave dhe shfaqja e cigareve elektronike.
Në vitin 2000, një e treta e popullsisë së botës mbi 15 vjeç ishin duhanpirës, krahasuar me 20% tani.
Ku pihet më shumë duhan?
Numri më i madh i duhanpirësve është në Kinë: vendi me 1.4 miliardë banorë ka pothuajse 300 milionë duhanpirës, sipas të dhënave të OBSH-së për vitin 2020.
Indonezia gjithashtu ka një numër të lartë të duhanpirësve meshkuj: 62.7% e atyre mbi 15 vjeç pinë duhan.
Pirja e duhanit tani prek kryesisht vendet më të varfra: 80% e duhanpirësve jetojnë në vende me të ardhura të ulëta ose mesatare.
Në Afrikë dhe Lindjen e Mesme ka një rënie të vogël të duhanpirësve, edhe pse disa vende si Egjipti dhe Iraku po ndjekin rrugën e kundërt.
Sa është numri i të vdekurve?
Duhani është shkaku numër një i vdekjeve të parandalueshme: në mbarë botën një person vdes çdo katër sekonda për shkak të pirjes së duhanit.
Duhanpirja aktive ose pasive vrau pothuajse 9 milionë njerëz në vitin 2019, sipas studimit “Global Burden of Disease” botuar në vitin 2021 në revistën shkencore The Lancet.
Kanceri, kryesisht i mushkërive, problemet e frymëmarrjes dhe ato kardiovaskulare janë sëmundjet kryesore që lidhen me pirjen e duhanit.
/a.r
