Një 83-vjeçar nga Gorishova e Mallakastrës ka hedhur poshtë variantin zyrtar të vrasjes së këshilltarëve të Hekalit.
Në një intervistë me “Gazeta Shqiptare”, 72 vjet pas ngjarjes, Bajram Kalemaj, 10 vjeç në atë kohë, thotë se këshilltarët u vranë për hakmarrje nga një tregtar dhe se ngjarja nuk kishte lidhje me politikën.
“Kam qenë 10 vjeç kur janë pushkatuar 11 hekaliotët pas godinës italiane në fshatin tonë. Ata nuk u vranë nga gjermanët apo ballistët, por nga një banor i zonës sonë.
Isuf Hasani ka qenë një banor i Rromsit. Ai ishte i kamur, por kishte influencë në fshatrat tona. Nuk bënte pjesë as me ballin dhe as me partizanët. Hasani merrej me tregti dhe shikonte punën e tij, nuk i bënte keq askujt. Disa ditë para ngjarjes, disa hekaliotë vranë dy vëllezërit e Isufit teksa po punonin në tokat e tyre. Isuf Hasani, në shenjë hakmarrjeje shkoi në fshatin Hekal me të afërmit e të njohurit e tij dhe mori 11 persona që dyshonte se i kishin vrarë vëllezërit. Pasi i lidhi për duarsh të gjithë që të mos iknin, në darkë i futi në një kasolle dhish në fshatin Rroms, disa kilometra larg fshatit tonë”.
Kalemaj thotë më pas se Isufi i pushkatoi hekaliotët në Gorishovë.
“Banorët e fshatit Rroms i thanë Isufit që të largohej prej andej me 11 hekaliotët që i mbante lidhur dhe të mos i vriste aty, sepse do hakmerreshin e do vrisnin të pafajshëm. Kështu që në mëngjes herët, Isufi me ata që e shoqëronin i morën 11 hekaliotët dhe i sollën në fshatin tonë, në Gorishovë.
Ata i pushkatuan pas një godine të vjetër.
Isufi, meqenëse nuk e dinte me saktësi se kush ia vrau dy vëllezërit, i mori të 11 dhe i vrau që të mos kishte njeri të hakmerrej ndaj tij. Dhe këtë nuk e them vetëm unë, por edhe banorë të tjerë të zonës”.
Kalemaj shton edhe se Isuf Hasani “iku nga fshati dhe shkoi në Amerikë. Jetoi deri në vitin 1992, por asnjëherë nuk erdhi në Shqipëri”.
