Gjurmë të makinave të djegura janë të dukshme përgjatë gjithë autostradës Tiranë – Elbasan. Këto shenja kanë mbetur nga djegia e një makinë vetëm 2 ditë më pare, në dalje të tunelit të Krrabës. Sipas policisë mjeti mori flakë teksa ishte në lëvizje. Megjithatë bilanci i makinave të djegura në 6 muajt e fundit përbën një rekord më vete.
83 automjete janë djegur vetëm në qarkun e Tiranës gjatë periudhës Janar – Qershor 2021. Sipas shërbimit Zjarrfikës në kryeqytet në 2-3 raste bëhet fjalë për autobusët e linjave. Eksperti i sigurisë rrugore Islam Qibini na tregon më shumë mbi shkaqet kryesore.
“Shkaqet kryesore për zjarret në automjete janë 2, sistemi i ushqimit dhe sistemi elektrik. Sistemi i ushqimit duhet të jetë i izoluar dhe të vejë direkt në motor, pra të mos ketë rrjedhje në tubacione. Edhe tani për shkak të temperaturave të larta krijohet zjarr më shpejt. Sistemi elektrik kabllot e baterive duhet të jenë të lidhura që mos të krijojnë shkëndija elektrike”.
Më të rrezikuara janë makinat me benzinë-gaz, çka rezulton edhe nga ekspertizat teknike të kryera tek mjetet e djegura.
“Drejtuesit e mjetit që kanë impiant benzinë – gaz duhet ta çojë patjetër për kontroll tek serviset përkatëse të certifikuara sidomos në këto temperature të larta që po kalon vendi ynë”.
Nuk është optimist mbi ndryshimet e bëra për kolaudimin e mjeteve pasi thotë se zgjatja e periudhës favorizon të tilla ngjarje.
“Kontrolli teknik me ndryshimet e reja është bërë 1 herë në 2 vjet kjo do të krijojë problematikën e vet, do të ketë ngjarje të tilla të herë pas hershme”.
I lartë është edhe numri i automjeteve të djegura në rrethe. Në 6 muajt e fundit janë 47 të tilla në bashkitë Shkodër, Durrës, Korçë dhe Lushnje.
/m.j
