Instituti Kombëtar i Shëndetësisë Publike në Kosovë konfirmoi të hënën edhe 26 raste të reja të të infektuarve me koronavirus, duke e çuar në 61 numrin e të prekurve.
Në një njoftim të këtij instituti thuhet se “nga 26 rastet e konfirmuara të gjitha janë kontakte të gjurmuara të rasteve pozitive (familjarë dhe kontakte të ngushta), të detektuara përmes hulumtimit aktiv epidemiologjik. Prej tyre 14 raste janë nga komuna e Malishevës, 11 raste nga Gjilani dhe 1 rast nga Gjakova”.
11 rastet nga Gjilani, janë anëtarë të familjes Shaqiri nga Vrapçiqi, të cilët u infektuan nga një anëtare e familjes e cila ka ardhur nga Gjermania.
Kryetari i Gjilanit, Lutfi Haziri, edhe pse e cilësoi si lajm të keq ai apeloi të qytetarët që të mos kenë shqetësim sepse kanë marrë veprime për karantinim të plotë dhe menaxhim të situatës në vendet e prekura.
Ai theksoi se Zhegra nuk e ka asnjë rast të ri pas testit të dytë dje, dhe pjesa tjetër e komunës është e paprekur. /e.s/
