Në samitin me rastin e 60-vjetorit të Traktatit të Romës, që pranohet si marrëveshja themeluese e BE-së, krerët e shteteve dhe qeverive të vendeve anëtare të Bashkimit Evropian kanë nënshkruar edhe Deklaratën e Romës, që përcakton objektivat e së ardhmes së unionit.
Franca, Gjermania Perëndimore, Italia, Belgjika, Holanda dhe Luksemburgu 60 vite më parë, më 25 mars 1957 themeluan Komunitetin Ekonomik Evropian.
Presidenti i Këshillit Evropian, Donald Tusk deklaroi se “vetëm një Evropë e bashkuar mund të jetë një Evropë sovrane e lidhur me pjesën tjetër të botës. Dhe vetëm një Evropë sovrane mund të garantojë pavarësinë e kombeve, lirinë e qytetarëve”.
Ndërsa presidenti i Komisionit Evropian, Jean-Claude Juncker, tha se “vetëm nëse jemi të bashkuar mund t’iu lëmë brezave të ardhshëm një Evropë më të begatë, më sociale dhe më të sigurtë.”
Duke vënë në dukje se janë të frikshme vështirësitë që BE-ja është përballur në kohët e fundit, Juncker tha se problemet me të cilat përballen sot nuk mund të krahasohen me problemet që janë përballur liderët themelues.
Deklarata e Romës
Në deklaratën e nënshkruar nga liderët synohet një Evropë më e fortë, më e sigurtë, më e begatë dhe më sociale në arenën globale.
Po cilat janë pikat kryesore të kësaj deklarate?
– Evropa të përpiqet që të gjithë qytetarët e saj të udhëtojnë lirisht dhe të sigurtë.
– Forcimi i politikës së migracionit.
– Vendosmëria në luftën kundër terrorizmit dhe krimit të organizuar.
– Rritja e punësimit.
– Investime dhe reforma strukturore ekonomike.
– Lufta kundër papunësisë, diskriminimit, përjashtimit social.
– Zgjerimi i mëtejshëm i partneriteteve aktuale.
