Nishani-Jahjaga: Bashkëpunimi rajonal, jetik për paqen
Presidenti i Republikës, Bujar Nishani, në një konferencë e përbashkët për shtyp me homologen e Kosovës, Atifete Jahjaga, ka rikonfirmuar bashkëpunimin dypalësh.
Nishani ka shprehur mbështetjen e Shqipërisë për dialogun Kosovë-Serbi, proces që sipas tij po i jep një frymëmarrje të re rajonit.
“Shqipëria ka mbështetur në vazhdimësi dialogun Kosovë-Serbi, i cili dha një frymë pozitive për rajonin. Bashkëpunimi mes vendeve tona i shërben paqes, stabilitetit dhe sigurisë rajonale”, deklaroi Nishani.
Nga ana e saj, Jahjaga ka falenderuar Shqipërinë për mbështetjen e vazhdueshme që i ka dhënë Kosovës. “Falë mbështetjes tuaj Kosova është përfshirë në samite dhe nisma rajonale e ndërkombëtare. Shqipëria e ka mbështetur Kosovën edhe në proceset integruese dhe pranimin në institucione ndërkombëtare”, ka thënë Jahjaga.
Presidentja e Kosovës vuri në dukje se me marrëveshjet e arritura në dialogun Prishtinë-Beograd, Serbia po shkon drejt njohjes së pavarësisë së Kosovës.
