Policia e Durrëst ka ndaluar 550 000 paketa cigare “Merhaba” të cilat u tentuan të futeshin të padoganuara në vendin tonë, çka solli dhe arrestimin e tre personave.
Siç njoftohet nga policia e qytetit bregdetarë, specialistët e Seksionit kundër Krimit Ekonomik dhe Financiar në Drejtorinë Vendore të Policisë Durrës, në bashkëpunim me Drejtorinë e Hetimit në Drejtorinë e Përgjithshme të Doganave, kanë finalizuar me sukses operacionin e koduar ”Eklips”.
Uniformat blu bënë të mundur arrestimi në flagrancë të tre shtetasve, që tentuan të transportonin paketa kontrabandë, konkretisht: Irfan Ameti 46 vjeç, lindur në Maqedoni dhe banues në Tiranë; Gjuljen Sami 52 vjeç, lindur në Turqi dhe banuese në Maqedoni; Ilir Dengu 53 vjeç, banues në Tiranë.
Arrestimi i tyre u bë pasi, në bazë të informacioneve të marra nga Shërbimet Homologe të huaja u ushtrua kontroll në kamionin me targa AA 679 KU dhe me trailer TR 0349 R, me drejtues shtetasin Ilir Dengu, ku i’u gjetën dhe i’u sekuestruan në cilësinë e provave materiale rreth 550 000 paketa të markës “Merhaba”, me vlerë në tregun e lirë 154 000 000 lekë të reja dhe kamioni me targa AA 679 KU. Malli i sekuestruar ishte ngarkuaer në Mal të Zi dhe nuk kishte dokumentacionin e rregullt dhe destinacion të përcaktuar.
Materialet i kaluan Prokurorisë së Rrethit Gjyqësor Durrës për veprime të mëtejshme për veprat penale”Kontrabanda me mallra që paguhet akcizë”dhe”Riprodhimi pa të drejtë i veprës së tjetrit”.
